Chico Harms ta un di e motornan cu ta mantene bibo pa loke ta actividadnan entre otro cultural, den e area di Brazil. Nan tin un proyecto sumamente importante y bunita pa duna realce na esnan cu semper tabata biba den e area y tabata un ehempel hasta pa e bario di Brazil.
E ta conta cu pa e aña aki nan tin algo hopi grandi y bunita pa e bario y Aruba completo. E ta algo unico cu pa prome biaha cu tin un Hall of Fame, a cambia e nomber na papiamento como Hardrei di Fama, caminda cu a scoge seis persona clave den bario, cu nan potret lo bay ta permanente den Centro di Bario Brazil, cual lo tuma luga dia 17 di December, durante un actividad hopi bunita y bon hinca den otro.
E lo cuminsa pa 7’or di anochi. Ta sigur cu e lo ta un anochi hopi bunita. A invita tur esnan cu ta na encargo di cierto deporte, cultura y diferente organisacion. Ta sigur cu esaki lo bira bunita. E famianan a keda masha contento mes. Ken cu papia di e actividad aki, nan a haya un sorpresa cu por a pensa riba algo asina aki. Esaki lo bira un actividad hopi grandi, segun Harms.
Conoci
E hendenan ta conoci caba. Cuater di nan ta difunto y dos ta activo. A reuni cu e famianan y tin cu bisa cu e personanan aki a keda hopi contento. Nan no por a spera cu nan lo a haya un sorpresa asina. Tur cos ta cla, prepara pa diadomingo.
Kende nan ta
Tin nos mama di cultura, Bernadina Growell. Tin Panchi Wever, esey tabata na encargo di futbol e temponan aya y tambe volkspel di aña di La Reina. Tin Leon Ras, kende ta musico, cantante. E conoce tur clase di instrument y tambe tin Vicente Ras, kende tur hende conoce como e persona cu ta toca dande, tambu. Tin tambe Ho Sing Loy, kende te awe ainda si un hende cu no sa unda pa yega centro di bario, djis bisa Ho Sing Loy bin nort. Su nomber a keda pega. Ta personanan cu ta hopi stima den e bario e temponan ey. Tambe sr. Luciano Wever, kende tabata den parochieraad di Brazil. El a bin cu e idea pa lanta un Centro di bario na Brazil y awe por mira cu e centro di bario ta bayendo den bon caminda, despues di 40 aña.
