Vicario Andres hunto cu Pastoornan di tur Parokia a reuni, comision organisador ta den ful preparacion pa e fiesta Catolico di mas grandi anualmente. Ta nos Patrona stima Santisima Virgen Mama Maria di Alto Vista nos ta recorda Su fecha.
Ta pesey ta importante pa fielnan bin mustra nos Mama stima nan amor y gratitud pa tur loke e ta haci pa nos y pa nos pais.
E nobena Nacional ta cuminsa diabierna awor 28 di september pa 5:30’or di atardi na Kapel di Alto Vista sigui pa un Misa canta. Tur dia un parokia ta na turno pa bin duna nos Patrona stima su homenahe bon mereci.
Dia 5 di october despues di misa lo bai tin adoracion Nacional na Kapel di Alto Vista cu presencia di Santisimo. Aki ta na unda pueblo lo bin reza pa den un naturaleza asina bunita, na unda nos Religion Catolico a nace, pa bienestar y protecion di nos pais cu tur su problemanan y tambe pa pidi’E sigui proteha nos pais.
Dia 6 di october despues di e Santo Sacrificio di Misa, e imahen di nos Patrona stima Santisima Virgen di Alto Vista lo ser saca y poni den porta di e Kapel pa asina e tin un bista completo ariba henter nos pais. Despues lo sigui vigilia te cu 12’or di anochi..
Parokianan cu ta na turno pa e vigilia ta:
7:30’or pa 8:30’or Gruponan di oracion di Santa Cruz y San Nicolas
8:30’or pa 9:30’or Gruponan di oracion di Savaneta y Brazil
9:30’or pa 10:30’or Gruponan di oracion di Playa y Dakota
10:30’or pa 12:00’or Gruponan di oracion di Noord, Tanki Leendert y Paradera
Despues di dia 28 di september e Kapel lo keda habri 24 ora, danki na CEA su seguridad y Cerd n.v. pa e luznan.
Ta bon pa menciona cu durante e vigilia henter anochi Santismo ta poni ariba altar, esaki ta algo sumamente grandi pa nos pais.
Dia 7 di october ta e fiesta grandi mes na unda tur parokianan ta bini hunto pa celebra e gran acontecimento aki, cuminsando for di 6’or di atardi. Lo bai tin un misa solem canta pa un coro bou direccion di señora Lila Richardson.
Corda cu October ta luna di Mama Maria, luna di flor, ta pesey tur fielnan ta ser pidi pa trece flornan pa dorna e kapel durante tur e dianan di celebracion.
Conhuntamente nos lo percura cu nos Patrona stima Santisima Virgen Mama Maria di Alto Vista lo haya su homenahe bon mereci. Corda cu Kapel di Alto Vista, ta un sitio santo y sagrado, cu ta ser bishita pa nos mes un hendenan y nos bishitantenan.
Pabien di antemano Pueblo di Aruba.
