Prome Minister Evelyn Wever – Croes cu un discurso a duna apertura n’e conferencia organisa pa UNFPA y CEDEHM. UNFPA ta un organisacion regional di Nacionnan Uni cu ta traha contra abuso di hende muhe conhuntamente cu CEDEHM.
E organisacionnan hunto ta organisando varios sesion/training importante tocante violencia domestico y ta duna na esunnan cu ta traha den area aki.
Ultimamente mas y mas ta tuma nota di diferente reto mundialmente, entre otro e pandemia cu a causa un efecto devastador y e guera na Ucrania y e otro sitionan cu tambe a causa hopi
sufrimento. Den tur esaki, e realidad a mustra cu hende muhe y mucha ta desproporcionalmente esunnan mas afecta den situacionnan di crisis. Pa e motibo e training aki ta sumamente relevante, Premier Wever-Croes a enfatisa.
“Como Gobierno, nos ta lucha pa igualdad di genero ta mas cu solamente un derecho humano
fundamental, pero pa e ta un aspecto central den un economia cu ta crece y tambe den crecemento inclusivo y sostenibel. Aunke cu hende muhe a logra hopi den ultimo decadanan, ainda ta nota espacio/gap na Aruba. Ta mira esaki den e arena politico, social y economico. De hecho, violencia di genero ta un di formanan di mas grave di discriminacion contra di hende muhe.”
Prome Minister Wever – Croes a sigui bisa cu como e prome Prome Minister femenino di Aruba,
el a tuma un interes special den e topico di igualdad di genero y pa percura cu avancenan ta tuma luga. Hunto cu UN Women, a traha Aruba su prome “Aruba Gender Policy” publica
na luna di mei di e aña aki. E documento ta un yamada pa accion pa tur ciudadano traha hunto y colabora pa yega na un Aruba cu ta mas prospero, husto y tin mas igualdad.
Aruba ta progresando den diferente area cardinal y cu e Aruba Gender Policy e meta ta pa adresa maneho cu ainda ta tuma nota cu tin e espacio pa mehoracion. Mester traha hunto den union pa e cambionan necesario tuma luga.
Prome Minister a conclui gradiciendo un y tur pa e curashi y perseverancia. “Mi ta contento cu
CEDEHM ta organisando e training aki pa tur stakeholder cu ta traha den e area y mi ta contento cu e interes y cooperacion cu tin cu Nacionnan Uni riba e temanan aki”.
