“Nos tin un problema hopi serio cu salud mental”, asina Prome Minister, mr. Evelyn Wever-Croes a inicia bisando na su salida for di Aeropuerto Internacional Reina Beatrix, prome cu a subi avion rumbo pa Hulanda.
E comentario a bin despues cu a puntra e prome mandatario riba e situacion di Respaldo, caminda gobierno ta cortando den nan subsidio, pa cual e efectonan ta Cuerpo Policial tin cu carga e consecuencia. Recientemente ta mirando e pashentnan di salud mental ta bay cas y ta crea un situacion hopi fastioso, pues aumentando problema social riba nos pais.
E prome mandatario a confirma cu su gobierno a caba di aproba un subsidio adicional di 900 mil florin, pa cual ta paga 300 mil florin di biaha y despues den dos fase mas lo paga 300 mil florin cada bes.
E suma aki a sac’e for di e fondo di crisis, cual a crea na 2018. E tempo ey a presupuesta 1.8 miyon florin, pero a uz’e pa e crisis di COVID-19. Recientemente a bolbe agrega mas na e fondo y di ey a saca e placa pa subsidia Respaldo.
Wever-Croes ta considera e situacion di salud mental na Aruba un crisis.
