E ex-empleado di Departamento di Impuesto (DIMP), esta Roque de Cuba y e contribuyente G.T. ta culpabel di soborno pasivo y soborno activo. Esaki tabata e decision inmediato di hues despues cu e tratamento a tuma luga awe mainta den corte.
E caso aki ta trata di un suma di restitucion cu T. mester a haya y cu de Cuba a yud’e y cobr’e apart pa e trabou. Fiscal a pidi castigo pisa pa e ambtenaar y pa e ciudadano, pasobra den casonan asina di soborno, semper tin esun cu e rol activo y esun pasivo.
Fiscal a haya ambos culpabel. Pa e cliente T. el a pidi 80 ora di trabou pa comunidad of 40 dia cera. Pero den e caso di e ex-ambtenaar, kende a wordo retira y tin su caso awo na Hof, el a pidi 90 dia di cual 88 dia ta condicional (kitando e dianan cu el a pasa cera) y dos aña di prueba; 140 ora di trabou pa comunidad of 79 dia cera y un boet di 5 mil florin of 100 dia cera.
Hues a bay di acuerdo mesora cu e demanda di fiscal den caso di G.T. y a conden’e mesora. Den caso di e ex-ambtenaar, hues a hay’e culpabel di soborno pasivo. Mirando cu el a keda sin trabou, el a impone un castigo di 3 luna condicional y dos aña di prueba y 140 ora di trabou of comunidad of 70 dia cera. Pa e relato completo, lesa e edicion di TREMPAN di diabierna mainta.
