Segun cu por a mira riba e boletin diario di Departamento di Salud Publico (DVG), ya e casonan ta yegando 600 caso. E ta para awor aki na 591 caso.
Fuera di esey e resumen ta indica cu tin 32 persona a recupera, a registra un total di 86 caso nobo di COVID-19, di cual 81 ta residente y 5 no-residente. Cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 618 test. ‘Postivity rate’ entre nos residentenan ta 33%. Cantidad di fayecido relaciona cu Covid-19 ta 52 persona.
Hospital ta informa cu tin un total di 21 persona interna di cual 9 ta den Cuido Intensivo y 12 riba unidad general di covid. No ta descarta cu si cosnan sigui asina, por aplica medidanan mas estricto. Prevencion ta cuminsa cu nos mes. Evita di aglomera, semper bisti tapaboca den tur circunstancia y laba man mas hopi cu por of uza handsanitizer.
