Diabierna mainta e caso sumario di Fundacion Parke Nacional Aruba contra di gobierno y contra Ocean Villas mester a sigui.
Aunke a inicia cu e tratamento, na final hues a pospone esaki. Esey tabata debi cu e abogado di gobierno a haya cu e magistrado no tabata mustra imparcial pa cual a dicidi di wraak su persona.
E caso aki ta draai rond di e echo Ocean Villas a cumpra e historico Isla di Oro. Sinembargo e ta cay den e areanan protegi cu ta cay bou maneho di Fundacion Parke Nacional Aruba.
Diferente organisacion manera Aruba Birdlife Conservation, STINAPA y otro NGO-nan a uni nan mes na e caso aki, unda nan ta papia pa protege e area di Isla di Oro. Den e documentonan na corte ta para cu e NGO ABC na 2012 a bay parlamento y a pidi pa declara rond di 20 area di Aruba como luganan protegi. Y pone bou di Parke Nacional Aruba. Algo cu parlamento a bay unanimamente di acuerdo cu ne. A clasifica e area aki despues como area di naturalesa y marino den e ROPV. Y na 2023 a declara e area aki como un Ramsar Wetlands Area.
Por corda cu dia 9 di maart ultimo FPNA a haya informacion cu tin ekipo pisa riba Isla di Oro y cu tin cobamento. FPNA a bay haci nan investigacion y a constata cu esaki ta berdad. Como cu e ta un area marino unda no ta permiti pa haci ningun trabou eynan, a dicidi di cuminsa un caso legal.
Esey ta motibo cu inicialmente a bay corte y a pidi un orde maatregel unda cu a pidi pa para tur trabou. Y berdad a para e trabou. A pidi pa obliga gobierno actua contra Ocean Villas si nan sigui cu e trabou. Pero esey corte no a haya necesario. Corte a bay di acuerdo cu e peticion.
Den corte a splica cu a pidi pa no haci nada na Isla di Oro, pasobra e ta un area protegi.
Ocean Villas a cumpra Isla di Oro for di su doño y loke cu nan kier bay haci ta planta mata, pone palapa, etc. Pero tambe drech’e door di pone mas santo blanco pa e ta un area turistico. Pero FPNA a bisa cu esey no ta posibel.
Loke cu e compania a haci ta cumpra e erfpacht aña pasa pero e ta uno cu ta caduca na 2026. A bende e tereno sabiendo di existencia di e ROPV den cual ta para cu e area aki ta forma parti di area protegi. FPNA a dicidi pa evita problema door di pidi pa para e trabou prome cu cuminsa.
Den e caso aki ROPV ta algo obligatorio pa cual no por cera ningun acuerdo cu ta bay contra di dje. Y esey ta e punto cu FPNA ta para riba dje.
Dado momento hues a cuminsa un discusion puntrando si e duna gobierno un ordo cu ta prohibi nan di prolonga e erfpacht na 2026, ora cu e ta vence, si e partido tin problema. E discusion a sigui bay bin. Y Gobierno a sinti cu e hues su forma di actua no ta imparcial y sin cu a duna nan derecho ainda pa reacciona riba loke cu FPNA a trece dilanti, pa cual e abogado a dicidi cu ta bay wraak e hues. Abogado di gobierno tabatin problema cu e punto aki pasobra nan a duna di conoce cu caba cu na 2026 no ta prolonga e erfpacht y no ta mira pakico hues kier impone un decision for di awo caba.
Cu e decision aki awor, e procedura ta bay pa un wraakingkamer. Awo ta bay wak si e peticion aki tin base. Si esey ta e caso, lo kita e hues for di e caso y pone otro na su luga. Si e no tin base, e lo sigui for di e punto unda cu el a keda.
