Na februari 2019 hues a sentencia ex-minister Paul Croes na cuater aña di prizon, kitando e 80 dianan cu el a pasa den detencion preventivo y cu pa 9 aña largo e no por participa mas den eleccion parlamentario ni por traha mas den gobierno. Dos aña despues di e sentencia, na januari 2021 a cuminsa cu e caso di apelacion den Corte Comun di Caribe Hulandes. Pero e fin di luna aki, dialuna 30 di augustus 2021, e tratamento mes lo inicia den corte na Aruba, den cual tres hues lo bini di Caribe Hulandes pa atende e caso mientras cu abogado Pepi Sulvaran di Corsou y Demis Illes di Aruba lo defende e ex-politico.
Un di e acusacionnan den e caso IBIS contra e ex Minister di Labor, drs. Paul Croes, ta cu den e periodo entre aña 2014 te cu aña 2017, e lo a uza placa di Stichting Leadership & Excellence, cu ta su fundacion di campaña, den un forma indebido. E lo a haci uzo di e placa pa su cosnan personal. E suma cu Ministerio Publico ta acus’e di dje ta 55.000 florin den 4 aña, kiermeen 13.750 pa aña of 1.145 florin pa luna.
Caso IBIS a start, manera PG van Dam a catalog’e, como un “grootschalige en uitgebreidecoruptiezaak”. Parlamentarionan di MEP a consider’e como e caso di corupcion di siglo, a papia di 10 miyon florin y a detene Paul Croes pa 80 dia den isolacion completo, sin ningun contacto cu mundo eyfo! Con fiscal lo hustifica esaki den Corte Superior ta e gran pregunta. Con Ministerio Publico lo splica cu Paul Croes a haya un descuento chikito riba instalacion di un airco na su cas y pa esaki e mester bay cera 5 aña? Kico fiscal ta bay bisa cu Paul Croes a haya dos caha di cerbes, un wea di sopi pa un evento di AVP y mester castig’e cu 5 aña mas di prizon?
Manera abogadonan ta bisa, definitivamente caso IBIS no tin e embergadura y peso cu Ministerio Publico a present’e na pueblo. PG van Dam for di salida a yama e ex-Minister di Labor como “De Grote Vis” (Big Fish), pa asina bisa cu Paul Croes ta culpabel di un caso grandi di labamento di placa, fraude y corupcion. Awo fiscal ta bisa cu Paul Croes lo a uza placa di su mesun fundacion na forma robes? Dia 30 di augustus lo trata e caso den corte superior y eynan abogadonan tey mustra e tres huesnan cu e asunto no ta manera fiscal a pint’e.
Un ekipo di abogadonan di Aruba y di Corsou lo bataya den Corte pa purba convence e magistradonan cu ta Paul Croes mes a busca fondo pa su fundacion y tambe cu ta Paul Croes mes lo a paga gastonan pa e fundacion. Dus el a “schiet voor” cierto gastonan, manera pago di shirts, articulonan pa campaña, cuminda y bebida pa su team di campaña y despues a cobra e fundacion bek. Esaki ta un di e acusacionnan mas serio cu Ministerio Publico tin contra e ex-politico.
Tambe ta conoci cu e ex-politico lo a acerca companianan pa donacionnan den tempo di campaña pa su fundacion. Defensa di Paul Croes ta bisa cu e posicion y acusacionnan no ta logico. Dicon Paul Croes lo acerca companianan pa haci donacion na e fundacion y despues e mes ta “horta” su mesun fundacion? Su abogadonan ta insisti cu esaki no ta make sense, pues no tin sentido y ta un scenario cu fiscal a fabrica pa presenta e caso den prome instancia. Ta parce cu nan no conoce con e sistema politico local ta funciona, ni e asunto di fundacion di un politico, segun defensa.
Fin di luna e caso aki lo yega corte superior, unda tres hues lo dicidi si di berdad e acusacion cu Paul Croes a uza 55.000 florin di e fundacion na un forma indebido ta corecto. Pa entre otro e acusacion aki, Paul Croes a keda cera den isolacion pa 86 dia sin ningun contacto cu exterior of cu su famia.
