Despues cu a deten’e ayera mainta, awe tardi caba Sub Fiscal di Landsrecherche no a mira necesidad pa mantene Mary Hsing deteni. A lag’e den libertad, mientras cu e investigacion ta continua. Abogado mr. Rossi Marchena ta defende Mary Hsing den e caso aki y a confirma su libertad un rato pasa.
Mary Hsing tabata secretaria di ex-minister Benny Sevinger durante Gabinete Mike Eman I y II. E tambe di un manera of otro ta envolvi den caso Avestruz y diaranson mainta Ministerio Publico a laga deten’e y a hib’e oficina di Landsrecherche pa nan interog’e.
Tin cuater sospechoso encarcela ainda
Den e caso aki ainda tin cuater persona mas deteni, cual ta Frederick P. ‘Freddy’ Every, kende un tempo tabata coordinador di e ex-minister envolvi, como tambe Leoncita Arends, acusa pa falsificacion. Ex-director di DIP, Franklin Abath tambe ta deteni como tambe Pieter Susebeek.
Prome cu esey a detene e yiu muhe di Arends, esta Rebecca Richardson, Jeff Franken como tambe Gaby Werleman y su casa Ninosca Nuñez. E ultimo cuater personanan aki ya caba ta den libertad.
E caso Avestruz
Ministerio Publico a informa dia 2 di october 2019, dia cu a haci entrada hudicial, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro echonan castigabel posiblemente cometi relaciona cu otorgamento di terenonan di gobierno.
Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017. Ademas ta investiga e rol di ex-minister Benny Sevinger den esaki.
