Stichting Casa Cuna Progreso ta invita Aruba henter pa participa na nan actividad diadomingo dia 12 di Augustus 2018, un “Back To school Kid’s Fun Bazaar”, net prome cu scol cuminsa.
Casa Cuna ta duna e muchanan di Aruba e oportunidad pa bin pasa un momento placentero. Lo tin diferente cos manera Disney Recreation, Carousel, Dino Jump, Popcorn, Ice Cream, Grabbelton, al estilo feria, cu botter y renchi. Tur esaki hunto cu Refineria di Aruba, cu ta haci esaki posibel pa e stichting.
Lo bay tin varios voluntario yudando y ainda tin mester di mas. Si bo kier pone bo mes disponibel como voluntario, por tuma contacto cu Quilin Arends, como tambe Sheila v/d Biezen, na 5857177 of 5624533.
Stichting Casa Cuna Progreso pa loke Refineria di Aruba kier haci pa e muchanan y tambe muchanan di Aruba. E ta un manera tambe di recauda fondo. Entrada lo ta gratis. Riba e dia ey lo bay tin cuminda pa bende, lo bay tin paña, jeans nobo di 1 te cu 12 aña. Hasta pa hende grandi lo bay tin bon cos cu por haya den e bazaar.
Lo bay tin tambe cuminda dushi y cos dushi, koffie, etc. Un dia pa bo bin pasa dushi cu bo famia.
Refineria di Aruba
Communications manager di Refineria di Aruba, Mandy Leijenaar, a splica cu nan ta contento ta forma parti di e Kid’s Fun Bazaar pa e muchanan di Aruba. No solamente pa e muchanan di Aruba, pero tambe pa e muchanan di Casa Cuna tambe. Otro instancianan lo wordo invita pa bin disfruta di e diadomingo aki. Ta hopi importante pa RdA pa aporta na comunidad di Aruba, vooral instancianan manera Csa Cuna. RdA tambe ta invita comunidad di Aruba completo pa bin pasa e dia aki dia 12 di Augustus y celebra e dia hunto cu Casa Cuna.
Voluntarionan tambe por tuma contacto cu Refineria di Aruba na 2810100 pa asina por inscribi.
