Awe merdia 2:15 pm a yama Cuerpo di Bombero pa un candela di mondi den e bario di Palm Beach. Un candela cu a cuminsa chikito na e skina di Palm Beach # 40 a cana y menasa casnan den vecindario. Un unidad di bombero y dos patruya di polis a presenta pa atende e suceso.
Bisiñanan a conta nos cu e cas Palm Beach # 40 no ta habita di algun tempo caba. E doño di cas ta bibando na Hulanda y a laga su cas estilo tipo antiguo atras y sin habitante den dje. Tabata teme cu e candela por a pega e cas na candela.
Brandweer a sigura e cas for di nan yegada caba, pa evita expansion. Na mes momento un otro bombero a cuminsa combati e pidapida mondinan cu tabata kimando. A dura un rato prome cu a logra paga tur e candelanan chikito. Obvio cu e candela a cana lihe, pasobra den un rato di tempo a laga un area grandi kima atras.
Cuerpo di Bombero ta confrontando basta problema ultimo lunanan cu candelanan di mondi. Ta crea e impresion cu tin hende of hendenan cu ta haci nan mes culpabel na cana cende candela tur rond di nos isla. Cuerpo di Bombero, cu hopi reto di ekipo y trucknan, ta haya extra presion riba nan operacion cu e tipo di candelanan asina. Polis ta investiga pa logra yega na e sospechoso aki.
