Como reaccion riba Presupuesto Supletorio 2022, a bin un carta di diesun pagina pa Minister di Finansa y Cultura, mr. Xiomara Maduro. E mandatario a haya un lista di punto for di e expertonan financiero di College Aruba financieel toezicht (CAft). De facto, por considera e rapport riba e presupuesto supletorio como insuficiente (onvoldoende). CAft no ta kita di e percepcion cu, den forma delibera, Minister Maduro ta keda sin sigui nan consehonan y ta haci e debe di Aruba mas grandi, innecesariamente!
Dia 10 di mei 2022, CAft a conseha riba e Presupuesto 2022 y a duna diestres recomendacion. Nan ta, entre otro:
- Reduccion di gasto operacional di gobierno cu 40 miyon di florin;
- Resolve e asuno di Serlimar
- Mantene e recorte salarial di empleado publico cu 12.6%;
- Introduci medida den seguro medico
- Cobra mas impuesto
- Mantene gasto di personal na nivel di 2017
Pero, conscientemente Gobierno y Parlamento di Aruba, a pone e recomendacionnan aki un banda y a sigui test pasenshi di CAft of di Gobierno di Hulanda. Aunke cu mandatarionan ta desmenti y ta declara cu Gobierno a haci tur esfuerzo pa corta gasto, e cifranan compila pa CAft ta mustra un panorama totalmente contradictorio.