Diamars mainta alrededor di 10:30 am a activa varios patruya di polis pa yega un cas cerca di More 4 Less Car Rental na Sabana Blanco, pa un cacho brabo cu a more un peaton. Ey polis a constata cu ta trata aki di cas di Minister Ursell Arends. E señora a conta cu e tabata canando riba acera y diripiente dos cacho a sali atac’e. E porta di cura tabata habri y e cachonan ta cana los. Un di nan a mord’e.
Bisiña a conta cu constantemente tin problema cu e cachonan pasobra no ta cera nan paden di e cura. Of e cachonan tin un forma pa toch sali pafo di cura y ta ataca peaton. Den e caso specifico aki, e peaton, un señora a resulta herida pa cual a opta pa bay hospital pa ricibi tratamento medico avansa.
Polis a pidi pa presencia di e unidad canino di polis, conoci como K9, pa nan duna un man na e sitio. Nan a logra bay cu e cacho for di e sitio. No ta conoci unda a hib’e y kico lo bay haci cu e animal.
Di acuerdo cu ley, doño di e cacho ta responsabel p’e y mester garantisa cu e no ta sali di cura. E echo cu cu e cacho a haci daño na un otro, ta pone cu e doño probablemente ta haya un boet di polis y mester core cu tur gasto di e tratamento medico di e victima.
E caso aki ta poco ironico pasobra Ursell Arends ta precisamente e minister encarga cu maneho di cacho y constantemente ta haci promocion pa conscientisa publico riba nan rol pa cuida cacho y evita cu cacho ta cana los riba caya pa morde hende. Awo ta resulta cu e mes tin dos cacho brabo den cura cu constantemente sali afo y ataca hende canando riba acera.
