Aña pasa na september, Aruba Tourism Authority (ATA) a firma un acuerdo cu COA (Comite Olimpico Arubano) y diamars, 21 di maart, a renoba e acuerdo aki.
Segun CEO di ATA, Ronella Croes, aña pasa ora cu a firma e acuerdo aki, a papia di un compromiso di termino largo, a papia di partnership y esey ta loke a duna realce na dje.
Por bisa pasobra ta hopi satisfecho tambe cu resultado y e manera cu a traha cu otro como organisacion.
Pa ATA, COA ta un asociacion natural. Ta reconoce e importancia di desaroya y cultiva atleta riba nivel olimpico y ta reconoce tambe e balor grandi cu nan tin como embahador eyfo, promocionando Aruba, mirando tambe cu nan ta participa na diferente evento internacional y na diferente pais.
Sin lubida e gran promocion cu Aruba ta haya durante di e weganan olimpico tambe. ATA ta reconoce esaki, segun Croes. Adicionalmente el a haci algun comentario, cual e ta kere oportuno, e asociacion entre ATA cu e mundo deportivo riba su mes.
E ta un topico kisas cu hopi biaha ta cuestiona dicon esaki si y dicon esey no. Pa ATA e mundo deportivo ta importante. Ta haya e importancia pasobra tin diferente motibo tras di esaki.
Pa cuminsa, segun Croes, ta reconoce e echo cu Deporte ta yuda forma nos comunidad tambe y forma hoben den e cuadro di e asociacion cu ta celebra.
Esaki no solamente ta bon p’e motibonan ya menciona, pero nan ta brinda nos localnan tambe y e atletanan local, e oportunidad pa competi riba diferente nivel. Esey ta un ehempel di e asociacion di ATA, cu e mundo deportivo, fuera di locual nan ta cerando como acuerdo cu COA.
Wanda Broeksema, presidente di Comite Olimpico Arubano, a comenta di parti di e entidad deportivo, cu COA ta hopi contento cu e partnership cu tin cu ATA y di cuminsamento caba a vocifera cu e no ta un ‘one year plan’, sino un partnership, e ta algo sostenibel cu por mira resultado tambe.
Segun Broeksema, COA ta hopi contento cu e aña a cuminsa fantastico. E bishita di Thomas Bach a yuda hopi, pasobra mira e trabaonan cu COA bin ta haciendo. Ta importante pa COA pa sigui bay p’e siguiente nivel. P’esey partnership manera ATA ta hopi importante. Evento manera e Business Event cu a haci dos siman pasa, pa trece e informacion dilanti kico COA ta haciendo p’e atletanan, kico ta haciendo cu e fondonan, pa mira unda e atletanan ta bay.
mr. Nicole Hoevertsz, como secretario general di COA y alabes vice-presidente di Comite Olimpico Internacional, a gradici Ronella Croes di ATA p’e confiansa cu e entidad tin den Comite Olimpico Arubano y pa nan esey ta hopi importante.
El a sigui bisa cu e aña aki en berdad lo ta uno interesante y positivo pa ATA tambe. Ya cu e atletanan lo biaha regularmente pa representa Aruba den wega internacional. E aña aki atrobe tin cuater wega riba programa, cual t’e weganan Sur Americano de Playa na Santa Marta; ta bay tin wega Centro Americano y del Caribe na San Salvador; ta bay tin World Beach Games na Bali, Indonesia y lo bay tin e weganan Panamericano na Santiago de Chile.
Segun Hoevertsz, ta hopi bunita cu por a haci e conferencia di prensa aki riba e dia aki, cual ta apenas algun dia despues di dia 18 di maart.
E ta disfruta semper di e dia Nacional, ora cu ta celebra nos Dia di Himno y Bandera, pasobra como mundo di deporte, ta compronde e bunitesa, e acto special di representa e pais y representa e bandera di Aruba.
Pa mas detaye lesa TREMPAN
