Durante un conferencia di prensa na Biblioteca Nacional, pa presentacion di un buki nobo, tabata presente Astrid Britten (Directora BNA); Yosmar Sneek (coordinado Festival di Buki pa Mucha), Nathalie Croes (encarga cu apertura y alabes miembro di comision di Festival di Buki pa Mucha).
Directora Britten a papia di e cancion di e Festival cu ta “Ban Keiro” composita pa Zulaika Geerman; areglo musical y adaptacion, mixing, mastering Sergio Tje-A-Loi mientras cu e cantante ta Kital de Jongh.
E Buki cu ta presenta den e festival ta E faro multicolor cu ilustracion di Gewout Esselink y traduci na Hulandes pa Lilian Semeleer.
Biblioteca Nacional Aruba (BNA) ta publica un buki pa su Festival di Buki pa Mucha. Cada aña tin un tema cu ta e guia pa e grupo di autor y ilustrado. Pa 2019 e tema ta ‘Medionan di transporte’. E aña aki Richard Dabian a skirbi un storia pa e muchanan di Aruba. E buki su titulo ta ‘E Faro di Multicolo’ y esaki a keda ilustra pa Géwout Esselink. Richard Dabian actualmente ta traha na Biblioteca Nacional Aruba caminda e ta coordina actividad pa mucha. Géwout Esselink ta un ilustrador di Hulanda y e tambe lo participa na e Festival di Buki pa Mucha.
E buki aki ta un regalo pa muchanan di Aruba. Cu e apertura oficial di e Festival di buki pa mucha 2019 na Cas di Cultura, por haya e buki gratuitamente na tur libreria ora cumpra un buki pa mucha, tanten cu tin. E scolnan participante tambe ta ricibi un cantidad di e buki pa nan coleccion.
‘E faro di multicolo’ ta apto pa mucha den categoria di edad di 4 pa 12 aña. Esaki ta un produccion den dos idioma, Hulandes (De veelkleurige vuurtoren) y Papiamento. Sra. Lilian Semeleer a traduci e storia. Biblioteca Nacional ta gradici e autor Richard Dabian pa su bunita contribucion. Y tambe na e ilustrador di e buki Gewout Esselink y tambe Jeroen Hoogerwerf pa e redaccion.
E storia ta bay tocante e mucha homber Jeff cu ta habri un porta pa su mundo di fantasia. Loke ta mas pret ta cu e por hiba su amigonan y hunto nan ta biaha bay. E muchanan ta yega den un mundo di color y nan ta sigui nan soño bayendo pa e faro di multicolo.
