Holiday Inn a yega su di 50 aniversario y esey ta yena tanto gerencia com empleadonan cu hopi alegria. Y naturalmente como un famia nan ta celebra e hecho aki.
Segun Eva Ruiz, Marketing Director di Holiday Inn, ta conta cu nan ta hopi entusiasma. Fuera cu nan a pasa un aña maraviyoso y tambe ta gradicido na e huespednan, nan tin huespednan cu ta biniendo pa 50 aña. Tin di nan ta bin dos biaha pa aña.
E 50 añanan aki tambe ta bay pa e empleadonan ya cu tin algun cu tin mas cu 30 aña trahando. Esaki ta un celebracion familiar. Ta celebrando e famia di Holiday Inn. Tur huesped y empleadonan como tambe e localnan cu a sostene e hotel tur e añanan aki a bini hunto pa un fiesta banda di pool.
E hotel
Tempo cu Holiday Inn a habri, nan tabata tin solamente un tower cu apenas 200 camber. Despues di esey a agrega 400 camber mas. Mas o menos 5 aña pasa, a haci un renobacion y a crea un lobby nobo, caminda cu por mira lama for di leu y a haci mas cambio. A pone un pool adicional, a cambia e fitness center y e spa. “E hotel a evoluciona durante e añanan y naturalmente no ta mesun cos, pero sentimento si a keda. Tin e mesun brand durante tur e 50 añanan aki.”
Ta 50 aña cu hopi reto
E 50 añanan aki no a bay sin mas, ya cu el a bay cu hopi reto, segun sra. Ruiz. Tempo cu nan a habri tabata tin solamente tres hotel den e area aki y awe tin asina hopi hotel rond. Sinembargo, segun Ruiz, Aruba ta un isla feliz y super contento pa tin e oportunidad pa promove como un destinacion. No solamente como Holiday Inn, pero Aruba como destinacion ta maraviyoso. Tin asina hopi pa ofrece, tin hopi competencia. Sin embargo Ruiz ta kere cu tur hende tin e oportunidadnan aki.
Ta 50 aña di solo, alegria y recuerdo y staff y personal di Holiday Inn realmente ta kere den esaki.
