Desde dia 7 di mei ultimo a indica cu na varios parti di mundo a detecta presencia di e bruela di macaco. Ta trata aki di un infeccion hopi raro, cu den algun ocasion tabata detect ana Europa, casi semper ligan a biahe p’e continente Africano, caminda a contrae e infeccion.
Te cu awo a registra caso na Hulanda, Alemania, Australia, Belgica, Canada, Spaña, Merca, Francia, Italia, Portugal, Reino Uni y Suecia. Na Alemania a confirma e prome caso diabierna y na Australia tin un caso confirma y un posibel infeccion na New South Wales. Na Belgica a registra dos caso y a confirma dos caso diahuebs na Canada.
Spaña t’e pais cu mas caso positivo den e brote di e virus aki, cu 30 persona contagia na Madrid. Na Merca autoridad a confirma cu un individuo tabata diagnostica cu e virus aki, convirtiendo esaki den e prome caso di e virus detecta na e pais p’e aña aki. Francia na su turno a reporta cu ta sospecha di un caso di bruela di macaco den e region di Paris.
Tambe na Italia a registra un caso diahuebs ultimo, den un homber cu a regresa di un biahe for di Spaña. Na Portugal a confirma cinco caso y ta investigando 20 otro posibel caso. Na Reino Uni a informa diabierna cu ya tin binti persona diagnostica cu e virus aki desde 6 di mei y por ultimo na Suecia tambe a confirma un caso na Stockholm.
Tin di bisa tambe cu DVG na e momento aki no tin informacion pa duna relaciona cu e monkeypox (bruela di macaco) pa Aruba, nan ta siguiendo tur informacion internacional y di caribe, si na cualkier momento señala un of otro menasa local, lo sa di informa e comunidad inmediatamente.
