Despues cu dia 10 di mei ultimo a detene ex-minister Otmar Oduber, sospechoso principal den e caso Flamingo, na oficina di Landsrecherche, awe a drenta informe cu Oduber lo sali bek den libertad awe tard. Pues, esaki ta apenas dies dia despues cu a deten’e. Tres dia despues di su detencion a prolonga su detencion y prome cu el a cumpli dies dia na warda, a mud’e pa KIA dia 17 di mei ultimo. Locual mester subraya si ta cu fiscal a pidi pa prolonga su detencion cu ocho dia mas, pero hues comisario no a bay di acuerdo cu esaki. Mientrastanto Ministerio Publico ta evaluando pa apela e decision aki. Keda pendiente di 24ora.com pa mas informacion aki rato.
CASO FLAMINGO
Dia 24 di juni 2020, Landsrecherche (DLR) a haci varios huiszoeking en cooperacion cu RST (Recherche Samenwerkingsteam) y Cuerpo Policial Aruba y bou guia di hues-comisario. E huiszoekingnan aki tabata den cuadro di un investigacion penal di Landsrecherche tocante posibel delito di corupcion y otro hecho castigabel relaciona cu otorgamento di tereno di gobierno. E investigacion penal aki ta carga e nomber codico ‘Flamingo’.
Procurador General a duna Landsrecherche ordo na september 2019 pa cuminsa e investigacion aki relaciona cu informacion cu Ministerio Publico a ricibi di Cuerpo Policial di Aruba. Den e investigacion tin informacion tambe cu a wordo suministra na Ministerio Publico pa varios persona y organisacion. E investigacion ‘Flamingo’ ta dirigi primordialmente riba iregularidadnan den otorgamento di terenonan comercial di erfpacht den e periodo di 2017 pa 2019.
Mas concretamente bisa: e investigacion ta dirigi su mes riba e pregunta si un of mas compania a logra obtene incorectamente (un opcion) riba terenonan di erfpacht den e periodo di november 2017 pa december 2019, caminda ta investiga tambe e eventual rol di e minister anterior. Den e huiszoekingnan a confisca documentonan y cargadornan di data. Di awor pa dilanti e team investigativo lo analisa e contenido di e administratie y e computernan cu a wordo tuma den beslag y lo scucha e sospechosonan y testigonan.
