Pa mey anochi di diabierna na Brussel, Reino Uni lo laga Union Europeo y prome minister Boris Johnson lo cumpli su promesa electoral di ehecuta Brexito.
Pero e no lo bay tin mucho tempo pa saborea e triunfo di un divorcio cu, den tres aña y mey, a sacudi e politica Britanico te den su higra y a polarisa e nacion. Dia 1 di februari lo marca e comienso di un fase nobo di negociacion entre London y Brussel pa acorda e forma di su futuro relacion.
Nan tin te na final di 2020 – un periodo di transicion durante cual Reino Uni lo sigui ta, excepto di manera nominal, miembro di UE – pa yega na un acuerdo riba comercio y otro temanan manera siguridad, energia, enlacenan di transporte, derechonan di pesca y fluho di dato.
Johnson ta bisa cu 11 luna ta tempo suficiente pa logra un acuerdo comercial di “medidanan zero, quotanan zero” y a prominti – aunke e opcion ta eynan – no sigui cu e periodo di limbo mas leu di 2020.
Na rand di abismo, “un posibilidad cla”
Si nan fracasa, e situacion huridico pa defecto l o ta un Brexit sin acuerdo cu por resulta paraisante pa haci cu comercio entre Reino Uni y UE ta basa, entrante di 2021, den terminonan generico marca pa e Organisacion Mundial di Comercio, loke ta supone e aplicacion di medida y controlnan di importacion.
Stefaan De Rynck, asesor pa Brexit di UE, a bisa e siman aki cu “ta sigui ta un posibilidad cla” cu e dialogo ta acerca na rand di e abismo, ya cu pa haya un tereno comun pa dia 31 di december lo ta mas dificil pa acorda e terminonan di e divorcio pacta na october.
E acuerdonan comercial cu UE sa tarda añas pa completa y na Brussel ta poco loke ta kere cu e periodo di transicio lo ta suficientemente largo como pa seya algo mas cu un acuerdo comercial di minimo.
Choke den competencia
Pa Reino Uni lo ta mas facil logra algo mas si e tabata dispuesto pa sigui ta alinea cu e regulacionnan di UE, pero London ta insisti cu nan no lo bay asimila e normativonan di e bloke manera cu nan ta.
E preocupacion di Reino Uni ta cu e cumplimento di e normanan di UE ta dificulta e firma di acuerdonan comercial cu otro paisnan, specialmente cu Merca.
UE ta bisa cu nan no lo seya un acuerdo comercial cu un bisiña grandi y economicamente poderoso sin disposicionnan solido cu ta garantisa un competencia husto
Su demandanan lo centra den cuestionnan di “igualdad di condicion” – normanan ambiental y laboral, como tambe regulacion di ayudo estatal – pa sigur cu Reino Uni no por ofrece productonan riba e mercado unico di e bloke na prijsnan abao di manera desleal.
Sam Lowe, di e Centro pa e Reforma Europeo, a bisa cu e deseo na London ta pa tin un control total di e regulacion domestico y e politica comercial lo limita significativamente e alcance di cualkier acuerdo.
Aunke riba papel UE y Reino Uni tin 11 luna pa yega na un acuerdo riba e relacionnan futuro, en realidad e plazo ta hopi mas poco.
E combersacionnan no lo cuminsa formalmente te ora cu e Gobiernonan di UE acorda un mandato di negociacion na final di otro luna. Ambpos parti lo mester yega na un acuerdo na mediado di october pa duna e tempo necesario pa traduci e tratao na e 23 idiomanan oficial di UE y sigura e ratificacion parlamentario necesario prome cu e aña caba.
