Diahuebs mainta Corte a trata e caso di un grupo di habitante di Papilon, contra establecimento di un Burger King unda antes tabata Rowigini’s. E caso a wordo cuminsa contra J.M.K. Burger Holding VBA.
E preocupacion di e habitantenan ta cu esaki lo causa mas molester cu nan tin caba, cu e diferente otro establecimentonan di Fastfood cu tin den e bario.
E drive-thru y e huma di cushina lo causa extra molester pa esnan cu ta biba cerca di e edificio. Ya caba cu a cuminsa basha parti di e edificio abou, ta trece molester pa nan.
Abogado Gravenstijn, di JMK Burger Holding VBA, a splice cu semper tabatin actividad comercial na e edificio di Rowiginis, manera un bar y night club. Sinembargo awor cu kier a bini cu algo otro bisiña nan no ta di acuerdo.
Jerry Kock, kende a representa e Holding, a bisa cu ainda no tin nada concreto pa cu e edificio pasobra ta apenas den luna di november a cumpra e edificio y awo diripiente a haya e carta di un caso sumario. E no ta compronde e preocupacion di e habitantenan ya cu semper tabatin actividad comercial den e edificio en cuestion.
E ta haya cu no tin base pa stroba economia di Aruba y stroba creacion di cupo di trabou. El a bisa cu no tin ningun procedura cu nan a cuminsa pasobra ta apenas a cumpra e edificio: no tin mapa, no tin bouw vergunning y ainda no sa kico ta bay haci exactamente cu y den e edificio. Kock a splica cu tur cos ta hopi curu, y e compania no sa ki direccion nan ta bay tuma, ya cu na fin di aña a haci compra y oficinanan di Gobierno practicamente no tabata funciona.
Habitantenan
Elvis Lopez, vocero di e habitantenan, a bisa cu nan peticion na Corte ta cu nan no kier un otro fastfood den Santa Cruz. Esaki a pesar cu nan ta consciente cu no tin permiso otorga ainda. pero si nan a mira cu tin trabounan di construccion andando. “Bo no ta bay lanta un muraya si bo no tin pensa di construi un drive-thru.”
El a bisa tambe cu “nos tin hopi dificultad cu asina hopi negoshi den di Fastfood na Santa Cruz. E ta un desaster caba awo, tur dia trafico pega, tur dia problema pa saca auto di cura,” el a bisa.
Hues lo dicta fayo dia 19 di februari.