Accion den ora trempan di mainta a pone tur hende mobilisa direccion San Nicolas. Boto cu hende indocumenta a drenta y esunnan cu a bin topa cu vest band’i beach a bati alarma mesora na autoridad.
Den careda di 2:30 am ta prome informe cu a ricibi di un posibel ‘aanlanding’ caminda cu hende indocumenta lo a subi tera via santana di cacho. Aki ta caminda a bin topa cu vest, cu a duna indicacion cu lo tin hende lo a drenta.
Diferente unidad a rondona e area di Colony como tambe Grapefield pa asina cuminsa e buskeda. Entre cu ora tabata pasa, poco poco tabata bin topa cu un of otro canando rond. Mas den ora di mainta a detene varios di nan entre otro na subida di Lago Heights, mientras cu pa 8:00 am a indica di lo tin por lo menos cuater persona indocumenta den cercania di KIA deteni.
Transporte policial a mobilisa algun biaha pa asina transporta tur e detenidonan. Te na e momento aki no tin un cifra oficial, pero ta calcula cu a logra captura entre cinco pa seis hende te cu awo.
No ta descarta cu lo tin mas detencion na caminda. Un biaha mas tin cu cuestiona con ta keda posibel cu boto ta sigui drenta awa teritorial, te cu ta yega costa pa baha hende y logra drenta nos isla.
UPDATE
Mientrastanto Warda Costa a saca un declaracion cu ta bisa lo siguiente: Den cooperacion cu Korps Politie Aruba (KPA), Wardacosta a tuma nota di actividadnan sospechoso na altura di Cero Colorado.
Patruya di ambos organisacion a activa inmediatamente pa asina investiga e caso. Ta trata di 9 persona indocumenta (8 hende homber y 1 hende muhe) cu nacionalidad Venezolano (incluyendo e capitan) cu a yega Aruba via di un lancha.
Wardacosta hunto cu KPA a detene e capitan y a entrega e otro personanan na servicio di migracion, Warda nos Costa.
