Awe Gobernador di Aruba, S.E. Alfonso Boekhoudt, a huramenta mr. Bote ter Steege como Procurador General na Ministerio Publico di Aruba. E huramentacion a tuma luga na Cas Ceremonial di Gobernador. Pa motibo di e consecuencianan di coronavirus no tabatin otro invitado presente.
No por keda sin menciona, cu mirando e CV di e PG nobo di Aruba, cu por constata cu ta prome biaha den su bida e ta ocupa e funcion aki. E tabata un Fiscal y na Boneiro a yega na e funcion di Hoofdofficier, pa e tres islanan BES cu hunto tin 25.357 habitante entre Boneiro (20104), Sint Eustatius (3338) y Saba (1915). Pues awor e lo ta na cabes di un pais cu riba 110 mil habitante, cu hopi mas reto di criminalidad creciente, cu Venezolanonan yegando nos isla den forma masal di forma ilegal cu boto y reto cu un grupo grandi di hobennan local cu a cay for di nos sistema educacional y ta bira “cuminda pa husticia”.
Mester menciona cu no ta solamente un PG nobo ta bin, sino como tres Fiscal nobo lo cuminsa traha pronto na Ministerio Publico pa reenforsa e aparato hudicial aki y garantisa miho calidad di husticia pa nos pais. Te ainda no a menciona cu lo bin un Fiscal Mayor pa Aruba, pasobra esey tampoco nos no tin. Locual Aruba tabatin prome cu yegada di e Fiscal nobo for di Boneiro cu nan a promove como PG na Aruba, tabata un Abogado General, den persona di mr. Frans van Deutekom. E ultimo aki tambe a yega Aruba como un Fiscal y a crece den e funcion durante e ultimo añanan.
E trabou di un Procurador General ta encera cu e ta na cabes di nos Ministerio Publico, e ta conseha Gobierno di Aruba riba asuntonan di husticia y persecucion penal. Tambe e ta atende casonan di apelacion den Corte Comun di Caribe Hulandes. De facto, e PG ta e funcion di mas halto den husticia di nos pais. Pa algun tempo caba Aruba no por a haya un PG, te cu tabatin e discusion si nos mester un di nos mes of si lo tabata miho pa comparti un cu Corsou, Sint Maarten y islanan BES. Aunke cu hopi ta mira e aspecto di “autonomia” toch awo nos a acepta un Hulandes cu a bini for di Boneiro.
