Dr. Robert Dennert ta cardiologo na hospital y ta representa specialistanan di hospital y a expresa su preocupacion durante di e rueda di prensa hunto cu HAVA riba e situacion tristo cu sector di cuido ta pasando aden.
Dr. Dennert a enfatisa cu e situacion di crisis aki tambe por wordo sinti den e di dos liña, aunke cu no ta sintie di biaha den comunidad, apesar cu nan como mediconan specialista ta pasa aden tur dia. Como mediconan, nan ta haci nan best pa por suministra servicio basico mas miho posibel. Loke nan tin den e ultimo tempo y awo sigur cu e di dos brote, e casonan positivo di Covid a aumenta.
Dr. Dennert por a tira un bista di e update, y por nota cu tin 30 pashent riba e seccion di Covid y 10 persona den Intensive Care. Esey ta pone cu e sector medico di hospital, ta pone su atencion riba esaki. No solamente pa e paramediconan, pero tambe e mediconan specialista. Mester duna cuido adicional pa esaki. No solamente cuido, pero tambe pa aparatonan adicional, cual tin cu wordo cumpra. Esey ta algo cu nan no a keda presupuesta na principio di aña.
Naturalmente a haci recorte di solidaridad na hospital y si en caso mester wordo recorta cu e problemanan di cash flow cu ya caba hospital tin y no por paga e suministradornan y cumpra e aparatonan necesario pa trata e pashentnan adecuadamente. Si no por haya e aparatonan y tambe e personal necesario, e ora no por trata e pashentnan adecuadamente. E di dos consecuencia ta un brain drain den hospital, caminda cu e profesionalnan di cuido ta enfoca mas riba e pashentnan di Covid, caminda cu por trece e cuido regular na peliger, cual ta preocupa e specialistanan masha hopi mes.
E consecuencia tambe cu no tin e aparatonan necesario pa pashentnan di cuido regular y no tin fondo pa nan. Tambe cu un ciruhano no tin e materialnan pa su operacion. Si no tin e fondonan necesario, no por duna e cuido basico y si esey no por, e ora e specialistanan den di dos liña ta preocupa. Parce cu ta riba e punto cu esey por sosode. Ta pa e motibo ey mes dr. Dennert kier informa comunidad cu si e posicion di likides di e pais y sigur di cuido ta den peliger, nan no por garantisa cuido basico.
