Candelario ‘Booshi’ Wever, politico di partido UPP a reacciona riba e anuncio di Minister di Energia, Glenbert Croes, di e reduccion riba tarifa di awa. E reduccion di e aumento di prijs di awa y coriente, pues den cual cu a suavisa e medida di aumento cu a anuncia algun dia pasa, lo bay beneficia principalmente esunnan di menos entrada. Pero, e echo cu gerencia di WEB Aruba N.V. hunto cu gerencia di Utilities Aruba N.V. ta tuma un decision descabeya asina, sin participacion di gremio comercial y sindical, pa despues di pone poco presion, ta bira cambia e aumento manera cu sindicato a conseha di prome momento, ta confirma e “blunder” cu esunnan bon paga den top di e companianan aki a haci!
“Mi ta supone cu e lo bay tin efecto tambe pa henter e pueblo”, Booshi Wever a expresa. Loke a cay manera un sorpresa en todo caso ta e echo cu e reduccion lo sosode a base dje recomendacionnan haci pa e sindicatonan! Cu esaki e politico ta puntra su mes, si tur e directornan cu salario halto y supuestamente bon prepara y studia, si nan ta capas pa maneha e companianan monopolistico aki di nos pais. Cu como director bo ta tuma un decision pa despues bo doño di trabou laga bo cay pasobra e strategia di sindicato a resulta miho cu di bo, ta motibo pa bo saca bo mesun conclusion.
E motibo di su sorpresa tin di haber cu lo siguiente:
1. Dicon no a considera e opcion aki prome cu a bin cu e aumento? Si esaki no ta e caso anto mester conclui cu e aumento mas bien lo tabata un “natte vinger werk”.
2. Un cambio asina radical ta sosode den un habri y cera di wowo? Un echo cu e ora ta pone ami un poco preocupa pa e forma cu e companianan ta wordo maneha y e rol di gobierno den esaki.
3. Kico ta e funcion di esunnan cu mester supervisa e trabou di e companianan? Nan tin un derecho di existi ainda si sindicato, cu por cierto NO tin tur detaye, por logra di duna opcionnan viabel y realistico?
Mi ta kere cu a yega tempo pa pensa den fusion di e dos companianan y retira e Hunta di Supervision y pone e profesionalnan capacita pa maneha Utilities. Cu esaki mester stop di nombra sua y primo den funcionnan importante asina, den cual ta rekeri conocemento, experencia y specialisacion riba e materia complica aki. Mayoria di nan ta djis drenta e Hunta di Comisario pa por gana dos mil florin extra pa luna pa bay reunion un bes pa luna of e presidente cu ta gana tres mil florin pa luna. Pero, asina por mira cu ora nombra hende politicamente den funcionnan clave, cu nan ta bay laga un desaster atras. Pero separa di e Hunta di Supervision, no por kita wowo for di e directornan, esta Anthony Rojer (Utilities Aruba), Anthony Irausquin (ELMAR) y Aldredo Koolman (WEB). Nan tres, ganando top salario den gobierno, rondona di expertonan financiero, a tuma mal decision, a keda sin consulta y a laga politica influecia nan maneho, cu ta haci nan incapas pa maneha e companianan estatal aki.
