Corte di Prome Instancia di Aruba a ricibi bishita dje muchanan di “Buki di Pret Aruba” riba e dianan 29 di juli y 5 di augustus. Durante e bishitanan aki, e muchanan a ricibi un rondleiding y un splicacion cortico di e trabounan di corte, e huesnan y otro empleado di corte.
Pa siña e muchanan mas di nan trabou, Corte di Prome Instancia di Aruba a prepara un caso special. Aki a conta cu participacion di un hues y griffier di corte. Despues di esey, e muchanan a haya e oportunidad pa actua un caso. Despues di a haci nan caso, e muchanan a haya e oportunidad pa mira potret y video dje bus di detenido di Cuerpo Especial Arubano (CEA) cu ta trece e presonan na Corte di Prome Instancia.
Pa Corte di Prome Instancia di Aruba e momento aki tabata uno hopi agradabel y ta spera cu e encuentro aki tabata uno hopi informativo p’e muchanan. Corte di Prome Instancia ta spera cu e muchanan a gosa di nan dia den sala di corte y cu di e forma aki, cera conoci mas di cerca cu e estado di derecho cu nos tur ta biba aden aki na Aruba.
