Si! Tur aña alrededor di 250 persona, jong y bieu, ta haya un atake cerebral. Den Ingles conoci como ‘stroke’. Un atake cerebral ta un sangramento den e celebro of un infarto den e celebro.
Ora tin un sangramento di e celebro esaki ta nifica cu un ader di sanger a rementa. Ta papia di un infarto di e celebro ora cu un ader di sanger a wordo blokia. Den ambos caso, e suministro di oxigeno pa e celebro ta den peliger.
Dentro di algun minuut cu e celebro no ricibi nutriente esencial, e celulanan di e celebro ta cuminsa muri. Un proceso cu lo por continua pa e siguiente oranan. Tin persona cu no ta sinti nada. Pero tin un grupo di persona cu si lo mester sigui biba cu e concecuencianan di e atake celebral. Nan por bira por ehempel parcialmente invalido. Tambe e persona por haya cambionan di karakter of otro limitacion pa motibo di e atake celebral.
Pa haya sa si un persona ta hayando un posibel atake celebral, por haci uzo di e sistema di ‘FAST’. Esaki ta un denominacion den Ingles cu ta yudabo corda e señalnan di un atake celebral:
- ‘Face’. Cara. Check si e cara di e persona ta colga of trek pa un banda mientras e ta purba papia of hari cu bo.
- ‘Arms’. Brasa. Check si un brasa ta colga mas abou ora e persona ta purba hisa ambos brasa.
- ‘Speech’. Papia. Check si e persona por ripiti un frase simpel. E ta papia straño of incoherente?
- ‘Time’. Tempo. Durante un atake celebral cada minuut ta conta. Si bo observa cualkier di e señalnan aki, bo mester actua mesora. Yama 911 di biaha.
Tin otro señalnan tambe cu ta indica un atake celebral. Por ehempel biramento di cabes of e persona ta bira ciego diripiente den un banda di wowo. AZV ta cubri tratamento pa atake celebral. Tambe tin Fundacion CVA cu ta keda na Esso Heights C-16 y por yuda bo si tin cualkier pregunta. Yama na 5677004 of comunica cu nan na [email protected].
