E conocido taxista Albert Anthony “Nino” Alders di 45 aña di edad nunca a yega di gana un premio den su bida. Asina mes e ta biba cu e lema di “Haci bon y bon lol bin bek pa Bo” y ayera esey a resulta e caso tambe. El a gana e auto marca Ford modelo Figo cu Mustang Sport Boys Aruba a rifa den cuadro di recaudamento di fondo pa Casa Cuna. “Un auto chikito cu ta gasta tiki gasolin, net bon pa mi. Mi ta hopi contento cu mi premio”, asina Alders di Taxi # 168 a reacciona den un entrevista cu 24ora.com.
Tabata na fin di luna di september cu Mustang Sport Boys Aruba a anuncia nan evento “Let’s Lend a Hand”, cu a tuma luga ayera diasabra dia 26 di october riba Linear Park. E evento a conta cu entretenimiento bibo di Rincon Boyz, Tsunami, Buleria, Jeon, DJ Vibes y DJ Nutzbeatz. Ya for di 7:00pm musica a cuminsa resona y a sigui te cu 11:00pm, cu un publico grandi presente na e evento.
Albert Anthony Alders tabata contento awe despues di a ricibi su premio ayera. El a conta nos cu un amigo di dje a yam’e puntr’e si e ta dispuesto pa coopera cu un rifa pa yuda Casa Cuna. Cada rifa ta costa 10 florin y el a opta pa yuda cu un buki, pues 10 rifa balora hunto na 100 florin. “Bo mes sa, un bon gesto esey ta dor di yuda nan, e ora ey mi a dicidi di tuma full un buki, mas o menos tres siman pasa. Diahuebs pasa e conoci a yam’e pa cobr’e e buki rifa, cu el a paga mesora. El a tuma tur e 10 ticketnan y warda nan den su cartera. E number ganado a resulta 3263”, asina Nino Alders a conta nos.
“Ami ora mi tende di e luganan cu mester un ayudo, semper mi ta yuda. Dios ta corda bek riba Bo un dia y el a toca ami e biaha aki. Prome biaha den mi bida mi a gana un cos asina aki y mi ta contento cune. Manera nan ta bisa, haci Bon pa e Bon bin bek pa Bo. No ta e biaha aki so, mi a yuda varios biaha caba y awe a toca mi e suerte”, di acuerdo cu Nino Alders. E ta corda ainda cu e tabata drumi na su cas, ora cu su colega y amigo Buchi Cunucu di Taxi # 444 a yega su cas pa busk’e. El a spanta na un prome instante, pero a resulta cu ta un auto el a gana.
Mustang Sport Boys Aruba ta un fundacion cu ta existi desde juni 2016, cu meta pa promove y stimula tur cu ta interesa den e autonan di marca Ford y modelo Mustang, specialmente pa nan cumpra y mantene e autonan aki. Asina regularmente ta tene eventonan pa mantene e grupo uni y hunto. Riba dianan nacional, por topa cu e autonan aki ta keiro tras di otro, mustrando asina e bunitesa di e autonan pero tambe e union cu ta existi entre e chauffeurnan doño di e modelonan aki. Hopi di nan ta hendenan cu tin otro auto, pero ta sali keiro cu nan “Mustang” den fin di siman of riba dianan special. Mustang Sport Boys Foundation ta presidi pa Alexander Leijenaar, mientras cu Henry van Grieken ta tesorero y Kenny Solognier ta secretario di e fundacion.
