“Sumamente satisfecho cu e resultado di awe nochi”, esey ta e prome reaccion di Edwina Werleman, Presidente di Stichting Musica despues di un anochi ameno hunto cu e cantante- y lidernan di banda caminda a cera conoci cu e finalistanan cu lo participa na e final di Caiso & Soca Monarch.
El a continua bisando cu Stichting MUSICA ta sumamente agradecido cu tur cu a presenta durante e anochi aki pa scucha cua t’e finalistanan cu lo competi durante e anochi final cu lo tuma luga den Carnival Village dia 28 di januari.
Festival ready!
Siguiente paso pa Stichting MUSICA ta pa saca e ticketnan riba mercado pa benta. Por spera esaki durante e siguiente dianan nos dilanti. Ticket ta obtenibel na Citgo Boulevard, Citgo Palm Beach, Citgo Esso Ville y riba Pay.aw.
Durante di e dianan aki lo reuni cu e finalistanan p’asina papia tocante zonido, regla y alabes pone un fecha pa tiramento di lot y sa e secuencia di banda.
Keda afo
Na momento cu a sostene e ultimo reunion, segun Edwina Werleman, e no tabata un reunion facil, a bin riba mesa cu lo tin oportunidad pa discuti si lo pone tur hende den final y djey evalua tur situacion.
“Nos mester stick to the rules”, Werleman a enfatisa. Esaki ta nifica cu cada participante a firma pa participa segun regla y e regla ta bisa cu bintishete lo bay final pa loke ta trata soca.
Caiso & Soca Monarch
Esaki ta bira e di 8 edicion di Aruba Caiso & Soca Monarch. E evento aki ta lidera pa Edwina Werleman pa cinco aña caba. E aña ‘ki e festival lo tuma luga dia 28 di januari den Carnival Village. Tin un total di bintishete participante pa e categoria di soca y shete participante pa e categoria di caiso.
