Diamars anochi lat despues di 11:40pm a activa alarma di Big Bazaar situa tras di Caya Grandi, den Hendrickstraat # 8. Atrobe e negoshi a bira victima di vandalismo. Na december ultimo tambe a purba horta pero no a logra. Ayera nochi mesun cos, pero ta causa daño y laga e negoshi cu un gasto inespera.
Hecho ta cu e negoshi a hay’e forsa ta pine heki paden di e porta, di modo cu si kibra e glas mes, no por drenta paden toch. Na december e formula a funciona y ayera atrobe! Separa cu e heki do hero ta obstaculisa e entrada, e sistema di alarma ta activa mesora y patruya di siguridad ta responde lihe na e sitio.
Ayera atrobe e alarma a bay ON y e security guard a yega na e sitio y topa cu un bloki grandi dilanti e porta como prueba cu a kibra pa drenta pero no a logra. A nota cu tabatin sanger riba vloer como indicacion cu e ladron a herida su mes den e proceso.
E doño di e pacus a controla paden pero no a sinti falta di nada. Polis a tuma datonan y a keda di investiga kende lo por ta e ladron cu pa di dos niaha ta fracasa den su intento.
