Pa dos botter di Hennessy a gara turista cu Dollars falso

Ayera tardi un pasahero riba vuelo di Surinam Airways a yega for di Surnam. E turista Surnameo a drenta Dufry wardando su maleta pa sali. El a cumpra un producto di $20 cu el a pasa adelanta. Pero a regresa pa cumpra mas. El a purba cumpra dos botter di Hennessy pero mesora a ripara cu e biyete di 100 dollar cu e kier a paga cune tabata falso. A informa autoridad mesora di su intencion y ta esaki mes a conduci na un investigacion mas profundo.

Polisnan di Aeropuerto a acerca e turista mesora y a detene pa un investigacion. Ora a habri su cartera y maletin, a bin descubri no menos di 4 mil dollar cash, tur na biyete di 100 dollar y tur tabata falso. Ta mas cu obvio cu el a bin cu plan di pasa un vakantie riba placa falso of purba cambia e biyetenan den real, kisas via casino.

Awendia mayoria negoshi, specialmente esunnan cu ta atende cu turista, tin mecanismonan moderno di control di biyetenan pa evita cu ta tuma placa falso. Pa e comerciante, cada biyete di 100 dollar ta representa un perdida grandi, pasobra banco ta tuma e biyete den beslag y ta pas’e pa Banco Central y ta traduci den un perdida pa e negoshi.

Pa por investiga esaki miho, a opta pa detene y hib’e Warda di Polis pa recherchenan por atende cune y purba saca afo su plan. Si ta algo structura cu e kier a bin “laba placa” y cambia placa falso pa placa real, ta hink’e den problema mas grandi ainda compara cu si a paga cu placa falso sin sa.

E sospechoso, un Surnameo cu a purba “dal tur hende abou” pero a hay’e mal sirbi. Na Corsou nan lo bisa “B’a sali malo caba” pasobra apenas yegando Aruba, haciendo su prome compra, ya nan a gar’e caba. Danki Dios pasobra a scapa cu lo por tabatin mas victima!

Hopi biaha un hende por haya un biyete falso sin por yuda, pero ora ta un asunto structura ta cambia henter e acusacion y probablemente e castigo tambe mara na tal crimen.

Noticia relacionaMas for di e autor