Un biaha mas e cadena di boticanan Benu a organisa un charla bou di e nomber “Benu Health Series”, y e tema trata e biaha’ki tabata “Stress”, un problema hopi grandi na Aruba, di loke por a sinti for di e participantenan.
Benu ta un frankicia di e consorcio internacional Benu y tin seis (6) botica convinientemente situa na Aruba. E siman aki a tene dos charla di e tema aki na Renaissance Convention cu a haya masha bon acogida. Tanto cerca e profesionalnan como e publico en general.
E prome anochi di e seminario cu e tema “Stress” tabata dirigi riba profesionalnan di e ramo. Asina el a conta cu participacion di Azria Palm, kende ta un “stress counselor” dunando charla na diferente empresanan local. E kier siña mas di Stress pa cual el a dicidi di participa na e evento di “Benu Health Series”.
Palm a splica cu tin hopi punto cu cada persona tin den su mesun man pa atende cu stress. Y mas den e mundo dificil di awendia unda tur cos (decisionnan) mester tuma luga den forma rapido. “Esaki ta pone peso extra riba e hendenan cu ta bay den stress. P’esey ta hopi importante pa cada persona reconoce ora cu e ta den un situacion di stress. Hopi hende no ta consciente di esey. Den e seminario di awe mi a siña algo nobo: bore out. Esaki ta ora cu bo kier traha, pero bo ta wordo limita. E charla aki tabata hopi importante pa doñonan di trabou tambe, ya cu hopi biaha nan no ta compronde di con un empleado no ta “perform” bon.”
Den e situacion di awendia ta masha importante pa tin un bon relacion na trabou, cu ta yuda den maneho di situacionnan di stress, ta loke cu a bini dilanti den e charlanan. Myrna Orman, otro participante, a siña cu hopi biaha tin termento na trabou y esnan na mando den un empresa no ta sincero cu nan trahadonan. “Mester atende cu tur problema, cu tur cos cu ta bay robes pa crea un miho relacion cu y entre coleganan. Esaki ta evita situacion di stress, cual sigur no ta yuda ningun hende bay dilanti.”
E seminario / charla tabata masha importante pa e profesionalnan di e ramo mes tambe, pa evita cu nan mes, apesar cu nan ta consciente di esey, cay tambe den un situacion di stress. Un di e problema cu e participantenan a constata aki na Aruba ta, sea un situacion di indiferencia of personanan cu demasiado problema, pues di un extremo pa otro. “E tin di haber cu e cultura di Aruba, unda e hendenan tin miedo di conta loke nan ta pasa aden. E ta algo cu nan no ta saca afo,” Sharlon Burgler a expresa na final di e charla.
E exito di un compania ta depende con bo ta trata bo trahadonan. Dia cu cuminsa haci esey, tin hopi compania exitoso na Aruba, pasobra tin hopi trahado contento, tabata e mensahe final di un di e participantenan riba e di dos anochi di e charla di Benu Health Series cu e biaha aki tabatin como tema “Stress”. E tipo di charlanan aki ta un forma di Benu pa bisa danki na comunidad pa acepta e servicio cu nan ta brinda na pueblo di Aruba por medio di nan diferente boticanan.
Benu semper cerca di bo.
