Hues a cuestiona ex-minister Benny Sevinger, awendia sospechoso principal den e caso Avestruz, durante tratamento di e caso den corte. E magistrado no ta compronde algun cos, manera dicon pueblo ta acerc’e y manda carta p’e y pio ainda, dicon e ta firma positivo riba tur peticion. E ex-minister a splica e hues di Hulanda cu ta asina e sistema ta funciona na Aruba y cu tur gobierno y tur minister ta mesun cos. E ciudadano ta manda carta pa e departamento y ora no haya reaccion, ta manda carta pa e minister pidiendo su intervencion.
Dado momento fiscal a pinta e situacion ful otro y mas bien ta pusha e hues den direccion cu Sevinger ta yuda hende di AVP so, pa duna nan un sorto di “fast track” pa por logra yega na nan tereno. A uza e ehempel di Leoncita Arends cu a haya firma riba su peticion mesora. Riba esey Sevinger a splica hues cu e no ta mira ken ta pidi tereno, e djis ta manda bisa Directie Infrastructuur en Planning (DIP) pa procesa e peticion, si e ciudadano ta cumpli cu tur rekisito pa haya un tereno. De facto, segun Sevinger, asina ley ta prescribi tambe, esta cu tur hende cu ta cumpli cu e rekisitonan ta bin na remarca pa haya su tereno.
Y pa por subraya e echo cu e no ta previlegia hende di AVP, el a duna como ehempel un carta cu ex-Prome Minister Nel Oduber a manda p’e como Minister di Infrastructura dia 10 di februari 2014. Den dicho carta na minister, e ex-premier di Aruba ta pidi Sevinger pa intermedia pasobra e tin casi dos aña wardando contesta riba su peticion pa prolonga e tereno “huurgrond” cu nan ta uza pa tres generacion caba band’i cas di su mama. Un dia despues di a manda e carta, esta dia 11 di februari 2014 el a drenta na su ministerio y su otro mañan, dia 13 di februari 2014 caba el a firm’e y mand’e pa director di DIP cu e instruccion tradicional: “Dezerzijds akkoord. Gaarne Uw medewerking” y cu firma di e minister.
“Y no ta pa Nel Oduber so, pasobra e tereno di su yiu Dangui tambe mi a firma y mesora tambe, pues pa mi splica hues cu no ta pa hende di AVP so mi ta firma, sino pa tur hende, di tur partido politico. Y cu mi ta hacie di biaha, esey ta conta pa Leoncita y ta conta pa Nel Oduber mesun cos, tur hende ta igual pa mi, aunke mi no ta sigur si Nel Oduber lo a vota pa mi den eleccion”, asina e mandatario a duna di conoce.
E caso aki lo sigui otro siman atrobe den corte. Ta spera cu pa fin di aña e caso lo ta cla, cu a scucha tur sospechoso y testigo, cu fiscal a haya chens pa pidi castigo y cu abogadonan a haya chens pa defende nan cliente. Avestruz ta un di e casonan di mas grandi di ultimo añanan, den cantidad di sospechosonan, huiszoeking y cantidad di pagina den e dossier di e caso penal aki, den cual ta acusa e ex-minister di corupcion cu tereno di gobierno.
