Ayera dialuna mainta a cuminsa cu e trabounan di construccion di e verkeersplateau dilanti Hyatt regency Hotel & Casino y den ora di anochi ya a keda cla, te cu por a habri e caminda bek. Dienst Openbare Werken (DOW) a desvia trafico cu baricada durante cu tabata trahando. “Otro aña 2023 lo cuminsa cu e reconstruccion di e caminda for di Riu Hotel te cu Holiday Inn. Lo haci esaki den fase”, asina DOW a publica riba nan pagina di Facebook.
Pa por garantisa siguridad den trafico y proteha peatonnan, a dicidi di construi un verkeersplateau dilanti Hyatt Regency tambe. Esaki mientras cu algun meter mas leu tin un caba dilanti Playa Linda Hotel. Awendia DOW mes ta haci e tipo di trabounan asina, cu ta dura net un dia. E intencion ta pa pone un capa halto riba caminda, cu ta sirbi pa baha velocidad y na mes momento fungi como un luga pa peaton por crusa e caminda.
Riba e mesun publicacion di DOW, varios ciudadano a comenta cu no ta un “verkeersplateau” mester awo, sino cu mester drecha e caminda completo dilanti e hotelnan highrise. Riba e ponencia ey DOW a contesta cu renobacion di J.E. Irausquin Boulevard ta programa pa otro aña. Pues pa awo ta di traha un “verkeersplateau” y otro aña bolbe kibra e caminda pa drech’e of trah’e di nobo.
Cu e verkeersplateau aki ta spera di por baha velocidad riba e caminda aki y pa tin un miho espacio pa peatonnan por crusa caminda sin problema.
