Un rato pasa, net despues di 9:00pm, Eddie Bennet di partido PPA a confirma cu algun minuut prome, nan lider politico Benny Nisbet a fayece na Dr. Horacio E. Oduber Hospital. E tabata luchando pisa pa keda na bida pero aunke el a gana varios bataya den e lucha aki cu su salud, awe nochi el a perde e guera finalmente. Un politico di hopi aña di experiencia, cu a ocupa puesto di parlamentario y minister. Alabes ta condecora den un di e nivelnan di mas halto den Orde van Oranje-Nassau, como “Commandeur”, un nombracion cu poco hende tin na bida. Watty Vos a yega di hay’e, Benny Nisbet y ex-gobernador Freddis Refunjol.
Benedict Nisbet ta naci na Aruba dia 21 di juli 1953 y ta lider politico di partido PPA desde 1982. “Benny Nisbet” manera tur hende ta yam’e, a participa den eleccion na September 2017 cu un lista combina cu UPP y hunto nan a cera 656 voto. Pa Benny Nisbet mes, el a conoce caida so e ultimo eleccionnan. Na 1997 el a haya 968 voto, na 2001 a baha na 931 voto, na 2005 a baha na 436 voto, na 2009 a baha na 329 voto, na 2013 a baha na 245 voto mientras cu den eleccion na 2017 a cay den voto te cu 150 voto.
Hopi forsa na su señora, su famia, amigonan y votadonan, specialmente di pariba di brug, cu semper a stima y sostene Benny Nisbet. Cu Benny sosega na paz.
