Desaroyo monetario
Compara cu februari 2022, e cantidad di placa den circulacion a subi cu Afl. 48,5 miyon te na Afl. 5.404,8 miyon den e luna di maart 2022. Esaki a resulta for di un crecemento den e reserva di divisa netto (+Afl. 381,8 miyon) y un bahada den e activo domestico netto (-Afl. 333,3 miyon).
Na maart 2022, e subida den e reserva di divisa netto a wordo causa pa compra netto di divisa di Afl. 685,3 miyon di publico, principalmente relaciona cu otro inversionnan y entrada for di turismo. Esaki a wordo parcialmente mitiga pa benta netto di divisa di Afl. 303,5 miyon na publico, primordialmente relaciona cu pago pa importacion.
E reduccion den e activo domestico netto a wordo causa pa bahadanan den tanto credito domestico (-Afl. 330,5 miyon) y den transaccionnan no relata na credito (-Afl. 2,8 miyon). E caida den credito domestico a resulta for di menos credito bancario netto na e sector publico (-Afl. 329,2 miyon) y menos credito bancario na e sector priva (-Afl. 1,3 miyon). E bahada den credito bancario netto na e sector publico ta wordo atribui na un subida den deposito di gobierno (+Afl. 329,2 miyon). E caida den credito bancario na e sector priva a wordo causa pa menos credito na consumidor (-Afl. 14,1 miyon), y mas credito na empresa (+Afl. 8,3 miyon) y hipoteca pa vivienda (+Afl. 4,5 miyon).
Inflacion
E nivel general di prijs, cu ta wordo midi door di e indice di prijs di consumo, a registra un subida di 4,0 porciento den e luna di maart 2022 compara cu maart 2021. E contribuyente principal na e aumento aki tabata e categoria “transporte”. Pa loke ta trata e promedio anual di e tasa di inflacion, esaki a registra 2,1 porciento na maart 2022, compara cu 1,7 porciento na februari 2022.
Entrada di Gobierno
Entrada total di gobierno a suma Afl. 86,3 miyon na maart 2022, cual ta Afl. 15,5 miyon mas cu e mesun luna di e aña anterior. Esaki a resulta for di un subida den entrada di impuesto (+Afl. 16,4 miyon) y un bahada den entrada no relata na impuesto (-Afl. 0,9 miyon).
E aumento den entrada di impuesto a wordo causa principalmente pa mas entrada for di impuesto riba importacion (+Afl. 5,0 miyon), riba e asina yama “turnover tax” (B.B.O.,B.A.V.P.) (+Afl. 4,9 miyon), y riba salario (+Afl. 3.1 miyon). Di otro banda, entrada for di impuesto riba ganashi (-Afl. 3,9 miyon) a baha.
Turismo
Na maart 2022, e cantidad di turista a registra 95.912 turista, cual ta 46.945 mas bishitante (+95,9 porciento) compara cu na maart 2021. E mercadonan Norte Americano, Latino Americano, y Europeo a subi cu 39.017 bishitante (+89,8 porciento), 3.132 bishitante (+165,3 porciento), y 3.731 bishitante (+147,0 porciento), respectivamente.
