Ayera nochi den un ceremonia y celebracion ameno, Pastoor Marcel Balootje, conoci como un contribuido di 24ora.com, tabata instala como Senior Pastor di Iglesia Pentecostal di Aruba. Esaki a tuma luga na Ibero American Highschool. Balootje a bisa cu e instalacion a bay tremendo y a gradici pastoor Andy Senteno y pastoor Williams cu a bini for di Corsou y tambe tur esunnan cu a compañ’e den su instalacion.
Mas aleu, Balootje a splica cu ta for di 2014 e tabata ordena como pastoor, pero pa e iglesia Pentecostal, awo el a bira Senior Pastor. Balootje ta conoci pa bay predica na diferente instituto rond di Aruba, specialmente na KIA. El a splica cu e tin ocho aña caba na KIA, “hibando palabra p’e presonan, mi tin mas cu dies aña na centro di rehabilitacion ta dunando e palabra tambe y tur dia riba caya y na iglesianan tambe, mi a predica tanto local como internacional…pa gloria di Dios m’e yega te Nigeria, Amen! Tur eseynan tabata preparacion pa un anochi manera awe.”
Balootje tabata sumamente contento cu e presencia di e diferente pastoornan cu a asisti su instalacion y a gradici Dios cu nan tur por tabat’ey pa presencia e bunita momento. Su mensahe pa pueblo di Aruba ta: “Hala mas cerca Dios, pasobra ta tempo pa nos busca Dios pa nos bida, nos cas y nos famia.” Asina el a splica cu e pueblo a hala mucho leu for di Dios bayendo tras di cosnan cu nos ta pensa cu ta moderno, pero cu a distrai e hubentud for di caminda di Dios y tambe e mayornan p’asina nan por disciplina e muchanan corectamente pa nan cana den caminda di Dios.
Pa termina, Balootje a bisa cu e iglesia ta den diferente bario rond di nos isla y ta duna Dios danki pa tur caminda cu nan por yega pa hib’e palabra. El a gradici tur hende cu a coopera pa su instalacion pa celebra un anochi grandi, bendiciona y special y a manda saludos pa su casa y su yiunan y a duna Dios danki pa tur cos.
