Christmas-in-a-box ta un bunita accion di Kiwanis Club of Young Professionals Aruba (KYPA) tin ya pa varios aña caba. Myrthe Franken, miembro di KYPA, a conta cu e proyecto aki nan tin tur aña p’e temporada di Pasco. Meta ta pa yena 100 hamper cu comestibles pa mucha den necesidad y cu nan no por tin un Pasco feliz.
Jeremy Erasmus, kende tambe ta miembro di KYPA, a conta Christmas-in-a-box ta nan ‘signature project’ y Ling & Sons un biaha mas ta brinda nan sosten pa por haci e proyecto aki posibel.
Manera ya indica e iniciativa aki ta pa colecta comestibles pa e famianan den necesidad. Tin un gran necesidad den pueblo di Aruba y tur producto standard, for di blek’i cuminda, soseishi, azeta, Corn Flakes, aros, tur esaki ta colecta pa asina duna bek na pueblo di Aruba.
E meta ta pa yena 100 di nan y te ainda, incluyendo aña pasa a logra tur aña pa yena mas 100 basket, semper surpasando nan expectativanan. KYPA ta hopi gradici tambe p’esaki.
Desde cu e pandemia a cuminsa, tin un necesidad grandi, KYPA, hunto cu Fundacion pa nos comunidad a tene un reunion, y a splica nan cu normalmente nan tin varios famia cu tin mester di cuminda tur siman. Desde cu e pandemia a cuminsa, e cantidad di famia a bira mas cu mil cu awo tin mester di ayudo. E ta hopi necesario p’e muchanan di Aruba pa tin e productonan di prome necesidad.
E miembronan di KYPA lo t’ey presente na Ling & Sons Supermarket awe 27 di 8:00 am te cu 4:00 pm y mañan 28 di november, di 9:00 am te cu 3:00 pm.
Tambe nan ta acepta donacion en efectivo sea den swipe of transfer via banco na CMB #61392702 Kiwanis Young Professionals Aruba.
Ban yuda e muchanan menos fortuna di Aruba y nan famia celebra Pasco. Ban yuda KYPA yuda mas di 100 mucha y nan famia cu no ta financieramente stabiel pa celebra Pasco.
KYPA (Kiwanis Club of Young Professionals Aruba ta un club di servicio di comunidad di profesional hoben entre 18 y 40 aña. E ta parti di e organisacion Kiwanis Internacional. E boluntarionan ta sirbi interes di e muchanan den e comunidad Arubiano a trabes di varios servicio.
Bin Ling & Sons y saca un man pa yuda nos muchanan a traves di Christmas-in-a-box di Kiwanis Young Professionals Aruba.