Diariamente e kantidat di persona lokal i turista ku ta trafiká den nos sentro di siudat ta oumentá. Ta di suma importansia na nivel di higiena general, salubridat i bienestar sosial pa tin fasilidatnan di tualèt aksesibel i públiko. Den sentro di siudat nos por tuma nota di un tendensia pa hasi uso di e hanchi smal nan pa urina, lokual ta laga un holó desagradabel atras i tambe un bista horibel pa tantu e persona lokal, komo e turista.
Parlamentario Pauletta a tuma nota ku e bañonan públiko na Punda i Otrobanda ya pa algun aña ta será, ku eksepshon di un. Esaki ta un oportunidat pa en kolaborashon ku ministerio di SOAW esaki realisá un proyekto di entrada adishonal pa personanan ku un ònderstant.
Den kuadro di esaki señora Pauletta ta hasi Minister Jesus Leito algun pregunta:
- Minister Jesus Leito lo por fasilitá parlamento informashon relevante di e estado di mantenshon di e 8 bañonan públiko situá na Otrobanda i Punda?
- Kua ta Minister su maneho pa ku baño públiko den Otrobanda i Punda?
- Si den kaso ku tin e posibilidat pa hasi apertura di e bañonan aki. Tin posibilidat pa huntu ku Ministerio di SOAW duna inisio na e proyekto kaminda ta fasilitá pa persona nan ku un ònderstant hasi e mantenshon diario di e baño?
