Rotaract Club ta contento y orguyoso di por presenta un otro edicion di e evento anual tan gusta cual ta Pasa Pret cu Rotaract. Dia 19 di november di 12:00 pm pa 5:00 pm, Rotaract lo ta organisando e evento pa mucha Pasa Pret cu Rotaract. E aña aki e club a organisa e evento cu e tema “Ban bek Club Caiquetio” caminda cu lo tin diferente wega pa mucha tumando luga. Banda di e weganan aki tambe lo tin diferente stand cu cuminda, bebida y lo tin animacion y entretenimento pa tur e chikitin nan.
E evento aki, manera e edicionnan anterior, ta pa celebra dia internacional di mucha. Despues di dos aña di pandemia, finalmente nos tin e oportunidad pa celebra e dia aki den grandi y p’esey Rotaract a opta pa bay bek Club Caiquetio pa asina mas mucha di nos comunidad por participa. Na yegada di Club Caiquetio, tur mucha lo ricibi un paspoort cual nan lo uza durante nan dia. Na cada actividad cu e mucha participa den dje, e lo haya un stempel den su paspoort.
Rotaract Club of Aruba kier gradici tur sponsor cu ta yuda pa haci e evento aki uno exitoso un bes mas. Un danki special tambe na Club Caiquetio pa nan cooperacion un biaha mas. E evento aki no lo ta posibel sin nan.
Rotaract Club of Aruba ta un organisacion pa hoben entre e edad di 18 cu 35 aña cu ta parti di e famia di Rotary Aruba cu ta consisti di Rotary Club of Aruba, Rotaract Club of Aruba, Interact Club of Aruba na Schakel College, Interact Club of Aruba na Colegio Arubano y Interact club Interact Club of ISA. A establece Rotaract Club of Aruba na 1991 y desde un principio ta organisa varios proyecto na bienestar di nos comunidad.
Mucha ta nos futuro, proteha y reconoce nan derecho semper lo ta nan prioridad. Rotaract Club of Aruba ta invita henter pueblo di Aruba y ta ansioso pa finalmente celebra e dia tan special aki den grandi cu boso tur. Ta spera di wak hopi mucha cu nan mayornan dia 19 di November di 12:00 pm pa 5:00 pm na Club Caiquetio.
Pa mas informacion, Like y Follow e pagina di Facebook y Instagram di Rotaract Club of Aruba of subi nan website www.rotaractaruba.com.
