Dia 30 di november, Maybelline Arends-Croes, un di Aruba su ciudadanonan di mas legendario, lo ricibi un homenahe durante e entrega di Premio nacional Crioyo di Oro. Ainda por corda con aña pasa, Jossy Brokke tabata e prome pa ricibi e premio prestigioso aki durante un concierto sold-out, cual e aña aki ta premira di sigui e mesun rumbo.
Motibonan cu e aña aki Maybelline lo ta esun pa ricibi e premio nacional y homenahe aki ta hopi. Banda di e echo c’un cantidad grandi di publico general a nomina Maybelline como e proximo Crioyo di Oro, semper Maybelline tabata un maestra di musica masha keri y un artista excepcional cu tabata tin e formula perfecto pa lanta e miho emocionnan den e ser humano.
Semper e tabata sa perfectamente con pa inspira, motiva y empodera nos comunidad cu e miho cancionnan y letranan. Specialmente e miles di mucha y hobennan cu a haya les y riba ken el a haci un impacto y tabata tin influencia di e miho forma posibel door di Maybelline.
Awe, hopi di nan ta lidernan ehemplar den nos comunidad cu tin un aprecio y stimacion grandi pa nan maestra di canto y musica. Maybelline su dedicacion na trabao boluntario tambe ta impresionante y admirabel. Tur esaki, sigur lo haci cu e anochi di gala aki lo bay ta uno completamente bendi for di trempan.
Durante e anochi aki un elenco extraordinario di e miho artistanan lo bini hunto pa rindi honor na e legendario local aki durante un produccion musical espectacular. Algun di e nombernan cu por menciona ta entre otro Cesar Olarte, Grupo Melange, Rocco Franken, Gloria Vega, Rachel Kraaijvanger, Erika Giel, Edjean Semeleer y varios sorpresa musical grandi prepara pa deleite di Maybelline y e publico presente.
Durante fin di siman, a hiba mas carchi na Cas di Cultura y ta obtenibel durante e oranan di trabao.
Tambe por comunica a traves di telefon 569-5442 cu Fundacion Go Cultura pa reservacion y entrega.
Fundacion Go Cultura ta gradici tur persona cu a uni nan mes na e proyecto aki y ta trahando duro hunto cu nos fundacion pa Premio nacional Crioyo di Oro por ta un exito rotundo.
Gradicimento na miembronan di prensa cu ta brindando sosten valioso na e homenahe aki y pa comparti e noticia continuamente cu nos comunidad.
Danki tambe na Ministerio di Cultura y Gobierno di Aruba, Departamento di Cultura, UNOCA, Prins Bernhard Cultuurfonds Caribisch Gebied, SETAR, ClickPrint, Aruba Airport Authority y Artopia pa e aliansa y sosten valioso.
Cumpra bo carchi y sigura bo entrada pa e anochi historico aki dedica na Maybelline Arends-Croes. Un otro anochi grandioso y exitoso.
