Un atake di misil Ruso riba e red Ucraniano diamars a haci cu e guera a extende n’e paisnan bisiña, cual a afecta Polonia, miembro di NATO y a laga gran parti di Moldavia sin coriente.
E atakenan a laga gran parti di Ucrania den scuridad y a provoca e desafio di Presidente Volodymr Zelenskyy, kende cu mokete cera a declara: “Nos lo sobrevivi tur esaki”.
Esalo ta e atake mas grandi di Rusia te cu awo y algun misil a crusa Polonia, causando morto di dos persona, segun un funcionario Mericano. Esaki ta e prome biaha den e guera aki cu e armanan Ruso ta cay den un pais di NATO. Un vocero di Gobierno Polaco, Piotr Mueller, no a confirma e informacion inmediato di un alto funcionario di inteligencia Mericano, cu a papia bou condicion di anonimato debi cu ta trata di un situacion di caracter sensibel.
Un di dos persona a confirma cu aparentemente e misilnan Ruso a impacta den un luga di Polonia situa na 15 kilometer di e frontera Ucraniano. Pero Mueller a bisa cu e principal lidernan ta celebrando un reunion di emergencia debi na un “situacion di crisis.” E medionan di comunicacion Polaco a informa cu dos persona a muri diamars atardi despues c’un proyectil a impacta den un zona unda cu ta seca grano na Przewodów, un pueblo Polaco cerca di e frontera cu Ucrania.
E impacto a afecta tambe e pais bisiña Moldavia. Segun un funcionario, tabata tin black-out masivo despues di cu e atakenan a laga un liña electrico clave cu ta abastece e nacion chikito cu coriente.
Zelenskyy a bisa cu Rusia a lansa al menos 85 misil, mayoria di nan tabata dirigi e instalacionnan electrico di e pais. El a laga varios ciudad sin coriente.
“Nos ta trahando, nos lo reestablece tur cos bek. Nos lo sobrevivi na tur cos”, e presidente a priminti. Su minister di Energia a bisa cu a atake tabata e bombardeo “mas masivo” riba e instalacionnan electrico den e invasion Ruso di casi nuebe luna, cu a golpia tanto e sistema di generator como e transmision di energia.
E Minister, Herman Haluschenko, a describi e atakenan cu misil como un “otro intento di vengansa terorista” despues di e obstaculonan militar y diplomatico di Kremlin.
El a acusa Rusia di “purba causa e maximo daño na nos sistema energetico na porta di invierno”. E atake aereo, cu a laga al menos un morto den un edificio residencial di e capital Kiev, ta bin despues di algun dia di euforia na Ucrania provoca pa un si exitonan militar mas grandi: e reconkista, siman pasa, di e ciudad Kherson.
