Bureau Rampenbestrijding Aruba awo ta conta cu un sistema digital, pa aisna nan por maneha crisis mas miho, cu asistencia, por bisa practicamente for di rond mundo.
Robert Toups ta representante di e tecnologia Raven y a splica cu nan ta hopi entusiasma di ta na Aruba pa sostene Rino Hermans y su team, pa asina introduci nan tecnologia na Aruba, pa yuda nan cu e maneho di emergencia, riba nan practica diario.
Toups a comenta cu nan ta un compania sin fin di lucro for di California y nan proposito ta pa plama e tecnologia Raven no solamente na Merca, pero tambe rond mundo.
Nan tin proyectonan exitoso na Australia tambe, y tambe California unda cu nan ta uza e mesun tecnologia aki.
Digitalisacion
Prome Minister Evelyn Wever-Croes ta considera esaki ta un momento special. A bin hunto na e oficina di Rampenbureau pa un motibo hopi importante. Ora cu un gobierno bisa cu ta pone e ser humano central, ta tene cuenta cu e ser humano den bon tempo, den mal tempo y den temponan di riesgo.
Den e caso aki Bureau Rampenbestrijding tin un tempo caba ta buscando un forma con pa por maneha crisisnan mas efectivamente. Bureau Rampenbestrijding ta conoci como e instituto cu ta prepara trainingnan pa asina Aruba y tur hende na Aruba ta bon prepara pa cualkier calamidad.
Den esaki naturalmente, mirando mundo cu ta cambiando y e plannan di e-government cu tin den gobierno, BRA ta busca un sistema con pa digitalisa e proceso di maneha un crisis.
Den e caso aki nan a yega na e tecnologia aki di Raven. E forma di atende cu crisisnan digitalisa. Tin trainingnan ta wordo duna pa expertonan, pa asina ta miho prepara den cualkier calamidad.
Esaki no ta solamente un ehempel di e-government, pero mas bien di e-crisis management, cual ta un manera digitalisa y mas eficiente, e ora den futuro por maneha crisisnan cu bin den cualkier circunstancia, caminda cu e profesionalnan no ta tur ora mester bin hunto pa delibera, pero ya algun, especialmente e plan y pasonan cu tin cu tuma, por wordo vigila y monitorea na un forma digital.
Asina por reacciona mas lihe, por reacciona mas efectivamente, sa mas miho unda e problema ta, cua ta e caminda cu tin cu cera of tin cu habri, cua ta e caminda cu tin cu bay prome of mester evita di bay. Bo tin un manera hopi mas eficiente y segun e mandatario, esun di mas safe pa atende cu crisis.
E mandatario ta contento di por mira cu e liña cora di digitalisacion y di e-government ta hay’e den tur aspecto den gobernacion y manera cu ta yame e-crisis management.
E mandatario ta felicita BRA, tur esnan cu ta traha hunto cu nan, riba tema di calamidad y den esaki felicita pueblo di Aruba, pa tin un bon sistema pa maneha nos crisis.
E costo di e sistema aki, lo ta internet, pasobra e software aki a wordo desaroya pa e crisis management riba vloer y ta un organisacion sin fin di lucro cu ta yudando full mundo. Segun Rino Hermans, ta trata di un software cu por yuda analisa, mitiga y maneha e crisis riba tur tres nivel e ta duna un aspecto no solamente pa crisis, pero pa cualkier informacion cu gobierno of un departamento di gobierno ta desea, ta updat’e y tur hende ta haya un mapa di con e situacion ta. Si ta papia di beachnan cu ta wordo afecta, e ta eyriba.
No tin experticio na Aruba, segun Hermans riba tur tereno, pero si awo BRA tin experticio for di rond mundo, cu na momento cu tin un incidente cu no por handle pasobra no tin experiencia den cas, tin esaki digitalmente. Cu un app ta indica kico ta e incidente, y ta haya sa kico ta e experticio. Esaki ta 24/7. Siguiente paso ta cu mester di e satelite box cual ta conecta via internet, caminda cu tur mundo por asisti. Si basa riba e situacion di St. Maarten, por laga Hulanda of tur pais, Merca, etc. wak hunto cu Aruba, kico ta e asistencia cu tin mester. Si por domina e crisis of ta perde fo’i man, na e forma con nan por prepara pa manda material pa nos. Esaki ta un win/win situation y e no ta bay costa mucho.
