Tanto diahuebs como diabierna, corte ta trata caso penal. E siman aki tin dos polis cu a haya nan mes ta presenta dilanti mesa berde pa defende nan integridad, conserva nan trabou y nan libertad. Esun di awe mainta 10.30 am ta un caso penal contra e polis, Simon Eduard Van Eenenaam. E tin un acusacion basta serio contra dje!
Ta acus’e di a maluza su funcion di polis riba dia 25 di april 2021, door di a detene un persona y hinc’e den patruya y cer’e den cel na ward’i polis. Tambe ta acus’e di intencionalmente y haciendo maluzo di su funcion, di a detene e persona en cuestion inhustamente riba e fecha menciona y a laga cer’e na warda. Na mesun momento el a informa Guarda Nos Costa tocante status di e persona cu e meta di logra saca bentaha pa su mes. Comosifuera poco, tambe ta acusa e polis di intencionalmente a traha un proces-verbaal falso di detencion den e periodo entre 25 di april 2021 te 26 di april 2021.
Un otro colega di dje tambe lo presenta diabierna den corte pa otro acusacion serio. Ta trata di Nixen Scholten. El a viola su ex pareha, a menasa y a maltrata su mesun mama. Cu e casonan aki por mira claramente, cu nos sistema ta funciona, cu no ta pasobra un persona ta polis, e ta para riba ley. E imagen di señora husticia cu su wowonan tapa, ta precisamente pa por persigui y condena tur hende, sin distincion di nan posicion, color, puesto of creencia religioso…ningun hende ta para riba ley.
