Aruba ta pasando den hopi problema serio. Medidanan cu ta strangula pueblo tuma a base diario y awor awa a pasa hariña ya cu ta lantando den protesta. Tres carta a yega te awo parlamento unda ta pidi auxilio pa e situacion alarmante cu ta asotando e humilde pueblo.
Un di e cartanan ta bin di directiva di HOH pidiendo e miembronan di e organo mas halto na Aruba pa un ayudo pa loke e unico hospital di Aruba ta pasando aden. Mientrastato, ABV, bond di trahado den cuido tambe a lanta y demostra cu un ora di welga su mal contento cu e situacion reinante. Esaki ta un comienso, ABV a laga sa. E miembronan a duna bond e mandato pa bay all out.
Lider di partido di oposicion AVP, mr. Mike Eman hopi preocupa ta splica kico ta pasando y con lo mester atende cu e amargura aki.
Eman: HOH ta bisa cu e medidanan cu ta bay tuma pa gobierno y AZV tin consecuencia dramatico y grave pa e servicio medico cu hospital ta brinda.”Nunca antes na Aruba a haya nos mes den un situacion caminda HOH ta anuncia di ta bay corta den servicio medico na pueblo”
Pa motibo di e desaroyonan aki y medidanan di gabinete Wever Croes, hospital tin cu bay haci escogencia cua ta e cuido cu tin cu duna y cua no. Den e carta HOH ta pone tambe cu lo mester mira cua vacatura ta bay yena y cua no. Mike Eman ta bisa cu esaki kiermen cu si hospital tin falta di personal, e vacaturanan aki no lo yena nan sin mas, mescos ta e caso cu waarnemers. Den pasado nos ta corda cu e oncoloog a bay y Aruba a keda sin waarnemer. A reina un disgusto grandi e tempo ey. Esaki ta bay bira e caso cu otro specialismo den futuro,” Eman ta teme.
Eman ta mustra cu den e carta di HOH ta bon cla poni cu e medidanan ta bay afecta empleadonan di hospital tambe. Esaki ta bay bin den e CAO nobo pa loke ta e condicionnan primario y secundario.”Esaki ta nifica cu e personal cu semper bay ta traha duro y sigur e ultimo añanan aki durante e pandemia, ta bay conoce cortamento den nan condicionnan di trabou y lo bin evaluacion pa loke ta empleado cu lo keda den servicio di hospital”. Esaki basicamente ta anuncio di retiro, Eman ta bisa.
E líder di fraccion di AVP, mr. Mike Eman ta continua bisando cu e situacion aki ta uno sumamente grave y ta algo cu tabata planea dor di Gabinete Wever Croes y cu nan a tene scondi. Dia 11 di februari un carta di henter e sector medico a yega Parlamento, hopi prome cu e carta aki di 4 di maart unda ta bati alarma riba e medidanan cu gobierno ta bay introduci den cual ta señala cu mester paga pa cada servicio medico.
Esaki no ta e cosnan cu e pueblo aki por carga. Ta algo iresponsabel y awe e mesun situacion iresponsabel aki ta yega na porta di nos hospital. Luna pasa henter sector di cuido medico a bati alarma y nada a wordo haci. Awe nos ta sinta cu un situacion alarmante, grave cu por termina den fatalidad. Pesey e fraccion di AVP a solicita un reunion di parlamento cu e sector di cuido cu te awe no a convoca. Tambe mr. Mike Eman ta lamenta e retiro di dokter Tim Peterson. Eman ta bisa cu den Paralmento fraccion di AVP a solicita intervencion di minister pa evita cu lo perde dokter Tromp y Peterson y awe toch nada a worde haci efectivamente pa evita esaki. Aruba ta perde atrobe yiunan di tera profesional den nan profesion.
