Den e buki di Jeremieas capitulo 31 vers 3 Señor ta bisa: For di leu aya Señor a aparece bisando: Mi a stima bo cu un amor eterno, p’esey cu misericordia Mi a hala bo.
Juan Capitulo 15 vers 13 ta bisa: No tin Amor mas grandi cu esaki, cu un hende ta duna su bida pa su amigonan. Romanonan Capitulo 5 vers 8 ta bisa: Ma Dios ta demostra Su mes amor pa cu nos den esaki. Cu tempo nos tabata pecador ainda, Cristo a muri pa nos.
Romanonan Capitulo 8 vers 35 ta bisa: Ken lo separa nos for di e amor di Cristo?
Pero tambe den e buki di Mateo ta skirbi den Capitulo 24 vers 12: Pasobra desigualdad (maldad of perversidad) lo aumenta y amor di hopi lo fria.
Si, asina mes. Amor di hopi lo fria, pasobra e palabra di Dios ta bisa cu laga amor ta sin fingimento, laga amor ta sin hipocresia, rechasa locual ta malo, tene firme na loke ta bon (Romanonan 12:9).
Pasobra ta hopi tipo di amor tin awendia; amor pa placa, amor pa interes, amor temporal, amor falso y mas tristo esunnan cu ta bisa nan stima Dios, pero den nan curason nan ta odia nan prohimo. Nan a lubida cu e palabra pordon ta existi, pasobra ta imposibel stima Dios y odia bo prohimo.
Dios kier pa nos stima otro cu un amor berdadero, caminda tin claridad den tur locual nos ta haci, caminda no tin ningun carta sconde den manga di camisa. P’esey Dios su palabra ta bisa den e buki di Galatas Capitulo 5:22 cu e fruta di Spirito (Santo) ta amor.
Awo na unda nos lo bay sin e Amor di Dios? Na unda nos lo sconde for di esun cu a stima nos prome. Ora nos mester para dilanti di Dios pa responde pa nos bida, cual ta algo cu por sosode den cualkier momento, kico nos lo bisa?
Cu ta motibo di hende, nos no ta sirbi Dios;
Of ta motibo di material nos a hala for di Dios;
Pa motibo di fiesta of paranda;
Pa motibo di un muhe bunita;
Of un homber cu bon tipo;
Pa motibo di posicion y gana di cos;
Of pa sostene amistad y maldad;
Of pa motibo di famay buscando un grandesa falso;
Of nos a rechasa Dios y bay den bruheria/santeria of cierto religion of profecia falso a bruha nos cabes?
Tene bon cuenta pa locual Pablo a bisa den e 2 Corintionan 11 vers 3: Mi tin miedo cu mescos cu e colebra a gaña Eva cu su astucia, boso mente lo wordo desvia for di e devocion simpel y puro di Cristo.
Pasobra nos ta wak con capricho di curason a aumenta, cu hende no tin cuenta cu hende, respet y moral a cay, hospitalidad ta debilita, mayor ta nenga di ta responsabel pa nan yuinan y ta laga cos bay for di man. Ta sconde tras di un excuus barata y bisa e muchanan a bira grandi y asina nan por ta riba caya.
Un capricho di curason caminda abuso ta wordo permiti. Basta tin placa a cambio di inmoralidad of ganashi deshonesto. Den un palabra bisa e enemigo ta ciega hende y asina nan amor ta fria pa otro y a aumenta pa materialismo.
Pero laga nos no lubida cu e amor di Dios ta eterno pa nos.
