“Abuso di poder den gobernacion bou maneho di Prome Minister Evelyn Wever-Croes ta sigui sin consideracion cu e situacion precario di nos economia y finansas publico cu Aruba ta aden. Tambe e hecho cu Aruba mester di su miho hendenan cu experticio den e posicionnan importante, no ta importa e prome minister demisionario Evelyn Wever-Croes, basta cu por sigui goberna cu un poppenkast politico”, asina parlamentario ing. Mike de Meza a bisa.
Asina por mira, cu por ehempel a cambia mas di 11 director di companianan estatal of institutonan crucial den menos cu 4 aña di gobernacion. AVP ta menciona facilmente entre otro Utilities (1), WEB (2), Elmar (1), AAA (1), Serlimar (2), Hospital (1), APA (1), RdA (1), Servicio Meteorologico (1) y AZV (1). Gran parti di e personanan aki ta yiu di tera y tur ta profesional cu hopi experiencia, educacion y experticio specifico den nan ramo di trabou! Esaki ta un brain drain enorme cu Aruba no lo a mag di perde.
Pueblo por corda cu entre aña 2001 pa 2009 tambe e gobierno di MEP a kita por lo menos 22 director di departamento of companianan estatal pa pone algun marioneta politico, asina Mike de Meza ta recorda. Awe atrobe ta nada nobo bou maneho di MEP cu e unico diferencia cu awe nan ta haci mescos pero cu sosten di un partido nobo cu yama RAIZ. Awor lo ta masha interesante pa scucha kico tabata e rason cu a causa cu e directornan mester bandona nan posicion y mira si e hechonan aki hunto cu e golden handshake lo ta aceptabel den pensamento di e trahadonan y sindicatonan tambe.
“Awo tin un coalicion nobo cu ta sigui cu e politica di parti golden handshake na balor di mas of menos 2 miyon florin pa motibo politico y trahadonan humilde di entre otro WEB, keto bay ta entrega 12.6% di nan entrada pa contribui na FASE pa esunnan cu a perde trabou”, segun parlamentario Mike de Meza. “Esaki ta ironia di bida, ora scucha prome minister Evelyn Wever-Croes ta exigi cu tur hende tin cu entrega un parti substancial di nan salario, pero na mesun momento e ta parti miyones den forma di golden handshake. Mas tristo ta ora esunnan cu a traha den sector priva a perde 40% di nan entrada, hopi a hasta perde trabou completo y e trahado publico y semi publico keto bay mester entrega tur luna 12.6% di nan salario”.
Mike de Meza a aclaria su opinion, subrayando cu “E bulamento di cabes di e dos directornan aki di WEB ta simplemente pa traha espacio pa sigui cu un maneho destructivo di e accionista, cu porcierto ta un mucha manda di e prome minister y cu tin ningun nocion di e industria di energia y produccion di awa cu coriente. Awe kier obliga WEB firma acuerdonan cu lo por causa basta problema financiero pa e mesun WEB y gobierno di Aruba. Aki ta caminda por mira con importante e interes di algun circulo di hende di e friends and family ta”.
Na mesun momento, lo ta interesante pa mira con y kende lo asumi e posicionnan aki siguientemente y con lo sigui cu e plan energetico den forma di un maneho mediocre di minister-president Evelyn Wever-Croes, a costo di e bienestar general. E plan pa a caba cu e contract di CITGO pa haya e yabi pa e refineria pasobra premier Evelyn Wever-Croes tin un lista di inversionista, awor ta conoci caba pa henter pueblo y lastimamente esaki a costa Aruba 320 miyon florin. Awe e refineria ta para ta putri y ta cay den otro anto no tin ni placa pa repurpose e tereno na San Nicolas pa crea posibilidadnan nobo pa specificamente San Nicolas y e economia engeneral di Aruba.
“Tur esaki bou maneho di e coalicion nobo di MEP y RAIZ cu lo sigui causa retonan nobo y hopi dificil pa Aruba! Ainda e landspakket mes no ta den ehecucion cu tur e medidanan cu lo bin riba lomba di e clase trahado”, asina Mike de Meza a termina bisando
