E vision cu ex-prome Minister Mike Eman a drenta gobernacion cu ne na 2009 despues di 8 aña di trabao duro a keda visibel den tur skina di Aruba. Un vision cu a encera hopi edificio monumental cu a keda rescata, renoba, restaura, remodela y tambe construccion di parke, plaza y otro centronan di encuentro y recreacion y infraestructura transformado pa Aruba. Di prome dia Mike Eman a traha di cerca cu Monumentenbureau y Monumentenfonds pa realisa proteccion, resctate y restauracion di hopi monumento laga na ruina. E inicio simbolico tabata e rescate di Bestuurskantoor. Un cu tabata na punto di wordo bendi door di e gobierno prome cu Gabinete Mike Eman.
Como lider di oposicion entre 2005 y 2009 Mike Eman a lidera e lucha pa no bende Bestuurskantoor y mantene y rescata e edificio historico aki como nos centro di gobernacion. Como Formado, na 2009 e a duna contenido na su palabra y a habri e portanan di Bestuurskantoor bek reubica trabaonan administrativo den e edificio di Bestuurskantoor – e tempo ey un edificio bandona y den un estado deplorabel. Inmediatamente a inicia e proceso di rescate y restauracion di Bestuurskantoor. Den esaki a logra apoyo di voluntarionan cu den un forma impresionante a yuda cu trabao duro dia y anochi pa haci e luga den un tempo record funcionabel atrobe. Eman y su coleganan cu tabata parlamentario y a bira Minister a laga riba su peticion nan derecho riba overbrugging cerca finazas di Aruba pa inverti den renobacion di Bestuurskantoor. E suma total di 5 minister cu tabata parlamentario cu derecho di overbrugging, laga pa gobierno pa cuminsa restaura Bestuurskantoor tabata riba 750.000 florin. Tabata placa cu pa ley nan tabata tin derecho riba dje, pero a scoge pa laga esaki pa pais Aruba pa por a inicia e trabaonan na Bestuurskantoor sin cu e gobierno a sinta ainda formalmente. Ki diferencia cu esunnan cu awe 4 aña a neglisha nan responsabilidad cu prioridadnan robes y ainda ta papia di gobernacion anterior. Hopi curashi!
Gabinete Mike Eman I y II a pone emfasis grandi riba restauracion di monumentonan. E vision di rescate di nos Centro di Gobernacion a haya un forma integral cu construccion di Cocolishi, Plaza Padu y restauracion y trabaonan di mantencion grandi di edificionan institucional rondona den e circulo ey: Edificio monumental Rekenkamer, Stadhuis, Censo, Edificio di Gabinete di Gobernador, edificio di Staten, edificio monumental Cosecha y Havenmeester Kantoor. Mike Eman su vision di renobacion di centro di ciudad y restauracion di monumentonan a inspira sector priva tambe pa inverti den restauracion di monumentonan priva.
E gobiernonan di signatura di su partido semper a duna prioridad na restaura y mantene nos patrimonionan nacional. Danki na esey nos a logra restauracion di edificionan monumental manera ta: Ecury y Henriquez Complex caminda nos impresionante Museo Arkeologico y Monumentenbureau ta situa, nos Stadhuis y Censo (cas di Arends y Hotel Colombia), nos Watertorennan na Playa y San Nicolas, nos Edificio di Corte, nos centro di gobernacion Bestuurskantoor, Edificio di Rekenkamer (antes Julianaschool, despues Biblioteca Nacional), Edificio Monumental Cosecha, Vuurtoren, cas di Gobernador, Nicolaas Store, scolnan monumental manera unda nos Universidad ta estableci, La Salle College, Dominicus College, Rosa College, Rosario College, Sint Antonius College, Abraham de Veerschool, Sint Augustinus College, Santa Teresita College y mucho mas. Un cantidad impresionante di edificionan monumental a keda rescata y restaura bao liderazgo di Mike Eman. Awe su preocupacion ta pa salba e edificionan monumental Juliana School y Beatrix School. Schoolnan cu a carga nomber di nos Reina Juliana y Reina Beatrix y a hunga un papel grandi den educacion di Aruba. E lo ta lamentabel si laga e monumentonan aki sigui deteriora y bay perdi. P’esey awe e lider di fraccion di AVP mr. Mike Eman a inicia hunto cu prominentenan den historia di enseñanza na Aruba un lucha pa proteha, salba, rescata y restaura e monumentonan Julianaschool y Beatrixschool.
