Avion cu mashin di hala rosea secuestra pa Turkia

6884

China a manda yudansa pa Spaña. Pero diabierna na Ankara autoridadnan di Turkia a stroba un avion cu ta bin di China carga cu mashinnan di hala rosea pa Spaña. E mashinnan aki ta pa yuda Spaña lucha contra coronavirus, e Minister di Asuntonan Exterior, Arantxa Gonzalez Laya a informa. Den un rueda di prensa el a bisa cu e autoridad di Turkia a stroba e avion durante nan escala na e ciudad.
E preocupacion di e Gobierno Turco tabata pa yena nan propio sistema sanitario. E Minister di Salud, Salvador Illa, y Laya a papia 3 biaha riba  asunto aki cu Turkia. E avion a yega e base di Torrejon de Ardoz cu 250.000 mondkapje, 20 mascara anatomica, 750 bril di proteccion, 2.000 paña di proteccion EPI y 1.000 litro di likido antibacterial.
Turkia a dicidi cu e mashinnan no lo sali di e pais ya cu e prioridad ta nan hendenan malo, pero cu “un plazo prudencial, e plazo di algun siman, lo pone e materialnan na disposicion di Spaña.

Turkia a debolbe mashinnan di hala rosea

Diasabra Spaña a ricibi e bon noticia relaciona cu e cargamento di mashinnan di hala rosea cu Turkia a wanta na e aeropuerto di Ankara. E Minister di Exterior, Arantxa Gonzalez Laya, a anuncia cu autoridadnan Turco a laga e materialnan bay y esakinan por yega e pais pa duna tratamento na pashentnan mas grave. Aunke na un principio a pensa cu e material lo keda pega na e capital di Turkia pa por lo menos “algun siman”, palabranan di Laya, e situacion a cambia. Den e proximo oranan 150 mashin di hala rosea cumpra pa Castilla-La Mancha y Navarra por sali di e pais y direccion pa Spaña.