Automobilistanan tin un preocupacion ora cu nan ta transita riba e caminda Kibaima-Tanki Flip, net un tiki mas p’abao di Piedra Plat Entertainment Center, na e t-kruising cu ta bay direccion Club Kibrahacha, tin un mata ta stroba e bista di trafico. E matanan ey ta hopi fastioso poni eynan.
Varios di e automobilistanan a tuma contacto cu DOW pa asina nan por tira un bista. Un di e chauffeurnan a comenta cu algun dia pasa por poco el a pasa auto riba un ciclista, pa motibo cu e mata a strob’e di wak.
Diasabra cu a pasa tambe un otro automobilista a haya accidente na e mesun caminda. Tambe bo ta haya automobilistanan cu ta busca chens pa subi caminda grandi, pero pa falta di visibilidad, por bin un desgracia.
Ta pa e motibo aki mes, mirando cu ta un caminda publico, ta bon pa DOW, percura pa tene e matanan mas abao cu ta posibel pa asina e fluho di trafico por bay den un forma ordena y sigur.
