Ta hopi remarcabel con a bira cu hende ta broma ora nan rabia, con nan a dal hende, con nan a kibra cos den cas, con nan fuse a bula, con duro nan core auto riba caya door di rabia, con nan a insulta polis door di rabia y bringa cu polis y keda deteni, con nan a maltrata nan esposa y yiunan door di rabia, cuanto cerbes y whisky nan a bebe door di ta rabia, con nan a bay for di cas door cu nan ta rabia etc. y un multitud di pretencion mas sin busca drechi, cu rabia no ta cos di haci wega cu ne. Rabia no ta solamente mental y fisico pero e ta pusha door di diabel pa asina pone bo haci cosnan den obedencia na diabel.
BIJBEL ta msutra nos claramente den Exodus capitulo 32:19 y Numbernan 20 vers 7 te cu 13 con pa motibo di rabia Dios a corta Moises su ministerio. Y tanto Moises como Aaron no a drenta e tera priminti. Esey ta pone cu rabia por ponebo haci locual cu bo kier, pero no ta locual cu abo kier ta agrada Dios. No ta importa ken bo ta, pasobra di Dios ningun hende ta haci chercha. Y den Numbernan Capitulo 20 vers 7-13 nos ta mira cu bo no por haci oracion na Dios, pidi Dios yudansa y caba bo tin carta scondi den bo manga di camisa, pa bo haci manera cu abo kier.
Hopi hende ta bolbe sconde tras di COVID y falta di trabao, y escases financiero, pa manifesta rabia cu hopi tempo caba ta biba den nan, pero nos kier recordabo cu COVID ta pasa, pero bo chens di perde bo libertad ta grandi y hasta perde bo famia y tur cos.
COLOSENSENAN 3:8 ta bisa: Ma awo boso mester pone tur esaki un banda, Rabia, Furia, Malicia, Calumnia y palabra sushi for di boso boca.
Palabra sushi a bira vocabulario pa hopi hende, cu ta kere cu esey ta soluciona problema, cu ta asina ta educa yiu, cu esey ta miho forma pa comunica cu esposa/esposo. Awel esey ta un engaño satanico, cual tin hopi hende domina y cu mester busca yudansa di Dios urgente, pa asina bo por ta libera di e mal spirito aki. Hopi biaha bo ta haya sa cu un hende tin dobel personalidad, door cu e tin mal rabia, y hasta bo ta tende mayor ta bisa cu for di chikito e yiu tin mal rabia, esey no ta algo di broma cu ne, esey ta un mal spirito cu mester di liberacion di dje, cua na prome luga e persona mester entrega su rabia na Dios door di oracion, ta pesey Santiago 4:7 ta para skirbi cu somete bo mes na Dios resisti e diabel y e lo huy bay for di boso.
Santiago Capitulo 1 vers 19-20 ta splica nos cla: Compronde esaki, mi rumannan stima: Tur hende mester ta lihe pa tende, no lihe pa papia, y no lihe pa rabia. Pasobra rabia di hende no ta produci husticia di Dios.
Rabia ta un sushedad cu kier domina bo bida, daña bo testimonio y caba cu bo integridad. Nos mester alerta e pueblo di e spirito di rabia y palabra malo cu ta moviendo, cu ta destrui famia, caba cu amistad, debilita nos hubentud, hopi di e muchanan cu ta cana den gang ta domina pa un rabia den famia, den cual nan a mira violencia domestico tuma luga y esey a causa rabia y rebeldia. Nos tin crisis social, pero rabia ta un di e cosnan cu mas ta pusha pa violencia domestico y e no ta kita cu sali pafo di cas, hala un rosea grandi of sali bay den auto, dal un buelta dal dos bitter, etc., etc.
Bo por ta cura di bo rabia ora bo entrega bo mes na Dios, awe mes y pidie kita e rabia for di bo curason, drenta den bo bida y duna bo un curason nobo, pidi Dios saca palabra sushi for di bo boca y laga respet, moral, y bon manera brota for di bo curason. Solamente Dios por cura bo curason di rabia y locual Dios haci ta permanente, acudi awe mes cerca Señor, bo cura ta gratis.
